குறியீட்டு விலக்க முதலீடு

குறியீட்டு விலக்க முதலீடு

Deindex Investing

சென்செக்ஸ் முதலான குறியீடுகளில் புதிதாக இணையவிருக்கும் நிறுவனப்பங்குகளை அவற்றின் இணைவிற்கு முன்னரே இனங்காண முடியுமா என்பது நண்பர் ஒருவரின் கேள்வி. முதலிலேயே அத்தகைய பங்குகளை வாங்கி வைத்திருந்தால் பின்னர் சென்செக்ஸை அடித்தொடரும் குறியீட்டு நிதிகள் அவற்றை வாங்கும் போது நாம் விற்று விடலாம் அல்லது அவற்றின் தொடர்ந்தவாக்கிலான இலாபப் பயணத்தில் பங்கு பெறலாம் என்பது அவரின் எண்ணப்போக்காக இருந்தது. 

சென்செக்ஸ் குறியீட்டில் இணைவதற்கு அவை பெரு நிறுவனப்பங்குகளாக (large cap stocks) இருக்க வேண்டும். தரமான இருப்பு நிலைக் கணக்கையும் (balance sheet) திடமான நிதி விகிதங்களையும் (financial ratios) அவை கொண்டிருக்க வேண்டும். நீர்மை நிறை (liquidity) மிகவும் முக்கியம். இவை போக சென்செக்ஸில் ஏற்கெனவே இடம் பெற்ற துறைகளை அவை சிறப்பு செய்வதாக (compliment) இருக்க வேண்டும்.

இத்தகைய பங்குகளை முன்னரே இனங்காண்பது முடியாதது என்பதற்கு அடுத்தது. மேற்கண்ட விதிமுறைகளில் அவை பெரு நிறுவனப்பங்குகளாக இருக்கவேண்டும் என்ற விதிமுறை  இத்தகைய பங்குகளை முன்னரே இனங்கண்டு, அது முடியாதெனினும்,  முதலீடு செய்யத் தடையாக இருக்கிறது.  

பெரு நிறுவனப்பங்குகளாக இருக்கும் பட்சத்தில், ஒன்று, அவை முதல் செறிவுடன் (capital intensive) அதாவது Coal India அல்லது Powergrid மாதிரி இருக்க வேண்டும். Coal India நிறுவனத்தின் பங்கு முதல் (equity capital) 6162 கோடியாக உள்ளது. Powergrid நிறுவனத்தின் பங்கு முதல் 9300 கோடி. அல்லது அவற்றின் விலை-வருவாய் விகிதம் (PE multiple) உயர் அளவுகளில் இருக்க வேண்டும். சென்செக்ஸ் குறியீட்டில் தற்போது இணைக்கப்படவிருக்கும் Trent நிறுவன விலை-வருவாய் விகிதம் 124.74 என்ற மிகை அளவில் உள்ளது. BEL நிறுவன PE multiple 52.07. இந்த முதல் செறிவு மற்றும் உயர் PE அவற்றின் முதல் பெருக்கத்தை (capital appreciation) கீழே இறக்கும் புவியீர்ப்பு விசை மாதிரி செயல்படும்.

மேலும் compliment என்ற கணக்கீட்டில் எந்தத் துறைப் பங்குகள் புதிதாக இணைக்கப்படும் என்பதெல்லாம் கம்ப சூத்திரமாக இருக்கும். 

முன்பே குறிப்பிட்டது மாதிரி, சில வரைமுறைகளுக்கு உட்பட்டு, சென்செக்ஸ் முதலான குறியீடுகளில் சில பங்குகள் இணைக்கப்படுகின்றன. சில பங்குகள் விலக்கப்படுகின்றன. மற்றபடி குறியீட்டில் இணையவிருக்கும் பங்குகளில் முதலீடு செய்தே ஆகவேண்டும் என்ற கட்டாயம் ஏதுமில்லை. குறியீட்டிலிருந்து விலக்கப்படும் நிறுவனங்களை விற்று விடவேண்டும் என்ற கட்டாயமும் ஏதுமில்லை. விலக்கப்பட்ட நிறுவனங்கள் பின்னர் இணைக்கப்பட்ட வரலாறும் உள்ளது. மேலும், இந்த இணக்கம் மற்றும் விலக்கத்திலும் தவறு நிகழக்கூடிய வாய்ப்புகள் உள்ளன. IBM நிறுவனம் Dow Jones குறியீட்டிலிருந்து ஒரு முறை விலக்கம் பெற்றது. பின்னர் மீண்டும் இணைக்கப்பட்டது. இந்த விலக்கம் மற்றும் இணக்கம் இன்றி IBM தொடர்ந்தவாக்கில் Dow Jones குறியீட்டில் இடம் பெற்றிருந்தால் Dow Jones குறியீட்டின் மதிப்பு இன்னும் உயர்ந்திருக்கும்.

Berkshire Hathaway நிறுவனப்பங்குகள் Dow Jones குறியீடு உட்பட எந்தக் குறியீட்டிலும் இடம்பெறவில்லை என்பது வியப்புக்குரிய ஒரு விஷயமாகும். Dow Jones குறியீடு பங்குகளின் விலையை அடிப்படையாகக் கொண்டு வடிவமைக்கப்பட்டுள்ளது. BRK நிறுவன class A பங்கு ஒன்றின் விலை 754505 டாலர். ரூபாய்க் கணக்கில் சொல்வதானால் 6 கோடியே 40 இலட்சம். BRK பங்குகளை dow குறியீட்டில் இணைத்தால் அதன் விலையின் காரணமாக குறியீட்டுக்கு அது மிகப்பெரிய அழுத்தத்தைக் கொடுக்கும். மேலும், BRK நிறுவன முதலீட்டுத் தொகுப்பில் இடம்பெற்ற ஆப்பிள் முதலான பங்குகள் ஏற்கெனவே dow குறியீட்டில் இடம் பெற்றுள்ளன. BRK பங்குகளை dow ல் இணைப்பது மிகைமை (Redundancy) ஆகி விடும். மேலும் BRK பங்குகளின் விலை அதிகமாக இருப்பதால் liquidity என்று சொல்லப்படும் அதன் நீர்மை நிறையும் மிகவும் குறைவாகவே இருக்கும். பஃபெட், BRK நிறுவனப்பங்குகளை இலவசப் பங்களிப்பு மற்றும் பங்குப்பிரிப்பு நடவடிக்கைகளுக்கு உட்படுத்தாமல் இவ்வாறு உயர் விலையில் வர்த்தகமாகும் படி வைத்திருப்பதற்கு ஒரு காரணம் இருக்கிறது. பங்கின் விலை இவ்வாறு அதிகமாக இருப்பதால் அதில் ஊக வணிகம் செய்ய இயலாது. மேலும், அதன் பங்குகளை வாங்குபவர்கள் நீண்ட கால முதலீட்டாளர்களாக மட்டும் இருப்பார்கள். பஃபெட், BRK பங்குகள் எப்போதும் அதன் மதிப்பை ஒட்டியே வர்த்தகமாக வேண்டுமென்று விரும்புகிறார். அவ்வாறு அது எப்போதும் வர்த்தகமானால் அதன் பங்குகளை வாங்குபவர்கள் மற்றும் விற்பவர்கள் தேவையில்லாத நஷ்டத்திற்கு ஆளாக மாட்டார்கள். BRK நிறுவனம் பஃபெட்டின் தன்னுணர்வுடன் இவ்வாறு வடிவமைக்கப்பட்டுள்ளது. ஆக, தரமான நிறுவனங்கள் கூட குறியீட்டில் சிலபல காரணங்களுக்காக இவ்வாறு இணைக்கப்படாமல் உள்ளன என்பதையும் கவனத்தில் கொள்ள வேண்டியுள்ளது. 

சென்செக்ஸ் குறியீட்டில் இடம் பெறவிருக்கும் பங்குகளை முன்னதாகவே இனங்கண்டு முதலீடு செய்யும் உத்தியை விட இன்னொரு அருமையான உத்தி இருக்கிறது. சென்செக்ஸ் குறியீட்டிலிருந்து விலக்கப்படும் நிறுவனங்களில் முதலீடு செய்யும் உத்தி தான் அது.

சென்செக்ஸில் இணைக்கப்படும் நிறுவனங்களின் கண்ணாடி பிம்பம் மாதிரி சென்செக்ஸிலிருந்து விலக்கப்படும் நிறுவனங்கள் இருக்கும். குறியீட்டு நிதிகள் இத்தகைய பங்குகளை விற்கத் தொடங்குவதால் அவற்றின் விலை-வருவாய் விகிதம் குறைந்து அவை மதிப்பு முதலீடாக மாறும். நிறுவனம் ஒருவேளை தற்காலிகமான தீர்க்கப்படக்கூடிய பிரச்னையில் இருந்தால் அவை மீண்டெழக்கூடிய வாய்ப்பு அதிகம். எத்தனையோ நிறுவனங்கள் இவ்விதம் மீண்டெழுந்து அவை குறியீடுகளில் மீண்டும் இடம் பெற்றிருப்பது வரலாறு.

இவ்வாறு தற்காலிகமான தீர்க்கப்படக்கூடிய பிரச்னையில் ஒரு நிறுவனம் இருக்கும் போது அவற்றை வாங்க வேண்டும் என்பது வாரன் பஃபெட்டின் முதலீட்டு விதிகளில் முக்கியமான ஒன்று என்பது இங்கு கவனம் பெறுகிறது.

குறியீட்டில் இணைக்கப்படும் நிறுவனங்களைப் பற்றிய தகவல்கள் பூடகமாக இருப்பது மாதிரி அல்லாமல் அவற்றிலிருந்து விலக்கப்படும் நிறுவனங்களின் தகவல்கள் பொது வெளியில் இருக்கும். அவற்றை ஆற அமர ஆராய்ந்து நாம் முதலீட்டை மேற்கொள்ளலாம். இவ்வாறு குறியீட்டு விலக்க நிறுவனங்களில் முதலீடு செய்யும் உத்தி குறியீட்டு இணைவு நிறுவனங்களில் முதலீடு செய்யும் உத்தியை விட அதிக வருமானத்தை அளித்திருப்பதும் வரலாறு. சென்செக்ஸ் குறியீட்டிலிருந்து 1982 - 2005 காலகட்டத்தில் 42 நிறுவனங்கள்  விலக்கவும் இணைக்கவும் பட்டன. இவ்வாறு விலக்கப்பட்ட நிறுவனங்கள் ஒவ்வொன்றிலும் தலா 10000 ரூபாய் என்ற கணக்கில் மொத்தம் 4.2 இலட்சம் முதலீடு செய்திருந்தால் அதன் மதிப்பு 2005 ஆம் ஆண்டு ரூ.78,91,232/- ஆகியிருக்கும். இணைக்கப்பட்ட நிறுவனங்களிலான முதலீடு ரூ.31,66,054/- மட்டுமே கொடுத்திருக்கும் (ஆதாரம்: Value investing and behavioral finance by Parag Parikh) Nifty குறியீட்டின் இத்தகைய ஆய்வும் இதே முடிவுகளையே பிரதிபலிக்கின்றன. 

குறியீடுகளில் இணைக்கப்படுவதான முதலாவது உத்தி buy high என்ற அடிப்படையில் இயங்குகிறது. குறியீடுகளிலிருந்து விலக்கப்படுவதான இரண்டாவது உத்தி buy low என்றவாக்கில் இயங்குகிறது. நிறுவனப்பங்குகளிலிருந்து நீங்கள் ஈட்டும் வருமானம் அதனை எவ்வளவு குறை விலையில் வாங்குகிறீர்கள் என்னும் புள்ளியிலிருந்து தொடங்குகிறது.

மதிப்பு முதலீட்டாளர் Seth Klarman ன் மதிப்பு முதலீட்டு மொழி ஒன்றுடன் இந்தப் பதிவை நிறைவு செய்யலாம்.

I am much inclined to buy a stock that has been kicked out of an index because then it may have value characteristics.

குறியீட்டிலிருந்து விலக்கப்படும் நிறுவனப்பங்குகளை நான் வாங்க விரும்புகிறேன். அப்போது தான் மதிப்பின் குணநலன்களை அவை கொண்டிருக்கும்.