பஃபெட் எங்ஙனம் பணக்காரர் ஆனார் ?

பஃபெட் எங்ஙனம் பணக்காரர் ஆனார் ?

இந்தக் கேள்விக்குப் பதிலாக ஒரு தனிப்பட்ட புத்தகமே எழுதலாம் . இருந்தாலும் அவருடைய முதன்மையான முதலீட்டு ஆயுதமான Float என்பதை மட்டும் இந்தப் பதிவில் பார்க்கலாம் .

வாரன் பஃபெட்டின் முதலீட்டு வாழ்க்கையில் நிகழ்ந்த ஒரு இனிய திருப்பமாக (serendipity) Float என்கிற இந்தக் கருத்தாக்கத்தைச் சொல்லலாம் . Float என்பதைப் புரிந்து கொள்ள காப்பீட்டு நிறுவனங்களின் வியாபார அடிப்படையைத் தெரிந்து கொள்ள வேண்டியது அவசியமாகிறது .

காப்பீட்டு நிறுவனங்கள் காப்பீடுதாரர்களிடமிருந்து முதலில் முனைமத் தொகையை (premium) வசூலிக்கும் . காப்பீட்டுக் காலத்தில் அசம்பாவிதம் எதுவும் நடக்காவிட்டால் இந்த முனைமத்தொகை இதர செலவுகள் போக நிறுவனத்திடம் தங்கும் . இழப்பு நேரிட்டால் நிறுவனம் உரிமைத்தொகையை (claims) வழங்க வேண்டும் . ஒரு காப்பீட்டு நிறுவனம் முறையாகக் காப்பீட்டை வழங்குமானால் உரிமைத்தொகையை மிகவும் குறைத்துக் கொள்ள முடியும் .

வாகனக் காப்பீட்டை எடுத்துக் கொள்ளலாம் . வாகன ஓட்டிகளின் விபத்து குறித்த புள்ளி விவரங்களை ஆராய்ந்து வாகனக் காப்பீடு வழங்குவதன் மூலமாக உரிமங்களைக் கணிசமாகக் குறைத்துக் கொள்ள முடியும் . இது தவிர பேரிடர் காப்பீடு , நீண்ட கால பங்குச்சந்தை F & O காப்பீடு , Key Man Insurance போன்ற தனித்துவமான காப்பீடுகள் என்று ஏராளம் இருக்கின்றன . வாரன் பனிமூட்டமாக இருக்கும் காப்பீடுகளின் பக்கம் செல்ல மாட்டார் . மேலும் Annuity (ஆண்டாண்டு பணம் தரும் காப்பீடு) தவிர்த்து பிற வாழ்க்கைக் காப்பீடுகளை (Life insurance) அவருடைய நிறுவனம் வழங்காது . பெரிய கதையைச் சுருக்கமாகச் சொல்ல வேண்டுமென்றால் margin of safety உடன் கூடிய காப்பீட்டை மட்டுமே அவருடைய காப்பீட்டு நிறுவனங்கள் வழங்கும் . இந்த மாதிரி காப்பீடுகளைக் காப்பீடுதாரர்களுக்கு வழங்கிப் பெற்ற முனைமத்தொகை float என்பதாக அழைக்கப்படுகிறது .

முன்பே சொன்ன மாதிரி முறையாகக் காப்பீடுகளை வழங்கினால் இந்த float பணம் ஏராளமான அளவில் நுகர்வோரின் காப்பீட்டுக் காலம் முழுமைக்குமாக  நிறுவனத்திடம் தங்கியிருக்கும் . மேலும் நிறுவனம் இதனைத் தொடர்ந்த வாக்கில் செய்து வந்தால் நிரந்தரமாக (perpetual) இந்த float பணம் நிறுவனத்திடம் இருக்க ஏதுவாகும் . காப்பீட்டு நிறுவனங்கள் ஒரு குறிப்பிட்ட சதவீத பணத்தை மட்டும் கையிருப்பாக வைத்து விட்டு மற்ற பணத்தை முதலீடு செய்யும் . முதலீடு செய்வது வாரனுக்குக் கை வந்த கலை . கரும்பு தின்னக் கூலி .

Underwriting profit என்பதையும் கொஞ்சம் பார்த்து விடலாம் . ஒரு நிறுவனம் காப்பீட்டுக்கான முனைமத் தொகையை வசூலிக்கிறது . நிறுவனத்தின் நஷ்டம் (வாகன விபத்து / புயல் மழை சேதம் இவைகளுக்கு எதிரான உரிமைத் தொகை) மற்றும் மேலாண்மைச் செலவுகள் இவற்றைக் கழித்த  முனைமத்தொகை வருவாய் நேர்மமாக (positive) இருப்பது underwriting profit என்பதாக அழைக்கப்படுகிறது . உதாரணமாக ஒரு காப்பீட்டு நிறுவனம் 1000 கோடி முனைமத் தொகை வசூலிக்கிறது என்று கொள்வோம் . 900 கோடி உரிமைத்தொகை மற்றும் இதர செலவுகள் . அதன் underwriting profit 100 கோடி . இதில் முனைமத்தொகை முதலீட்டு வருமானம் சேர்க்கப்படாது .

Underwriting profit என்ற நிலையை அடையப் பெறுவது தான் காப்பீட்டு நிறுவனங்களின் கடைமுடிவான இலக்காகும் . அரிதான சில சந்தர்ப்பங்களைத் தவிர வாரன் பஃபெட்டின் காப்பீட்டு நிறுவனங்கள் பெரும்பான்மையானவை இந்த இலக்கை எட்டி விட்டன . இவ்வாறு  வாரனின் காப்பீட்டு நிறுவனங்கள் செயல்படுவது நேர் பின்னூட்ட வளையம் (Positive feedback loop) ஒன்றை உருவாக்குகிறது . வாரனின் காப்பீட்டு நிறுவனங்கள் நன்கு செயல்படுவதால் ஆகப்பெரிய அளவிலான காப்பீடுகள் அதனைத் தேடி வருகின்றன . பஃபெட் இந்தக் காப்பீடுகளைக் கவனமாகக் கையாள்வதால் underwriting profit மற்றும் float பணம் கிடைக்கப்பெறுகிறது . நிறுவனம் இலாபத்திலும் நம்பிக்கையிலும் # 1 ஆக இருப்பதால் ஆகப்பெரிய காப்பீடுகள் அதனைத் தேடி வருகின்றன .

Reinsurance என்பதான ஒரு கருத்தாக்கத்தையும் பார்க்கலாம் . மிகப்பெரிய காப்பீட்டு நிறுவனங்கள் அவர்கள் வழங்கும் காப்பீட்டை மறு காப்பீடு செய்து கொள்வது Reinsurance என்று அழைக்கப்படுகிறது . இந்த மறு காப்பீட்டுக்கு மற்ற நிறுவனங்கள் தேடி வருவது வாரனின் நிறுவனங்களை மட்டுமே . இவ்வாறு underwriting profit - float Money - அவை மூலமான காப்பீட்டு நிறுவனப் பங்குகள்  - அவை வழங்கும் underwriting profit ... என்பதான முடிவற்ற கண்ணிகளால் ஆன ஒரு இலாபச் சங்கிலி பஃபெட்டின் முதலீட்டு நிறுவன அகழியாகிறது . இந்த நிரந்தர float மாதிரி வரி வகையறாக்களையும் நீண்ட கால முதலீட்டின் மூலமாக வாரன் கூடிய மட்டிலும் குறைத்துக் கொள்கிறார். இதனால் நிறுவனங்களையும் நிறுவனப் பங்குகளையும் வாங்க விற்க என்பதான உராய்வுச் செலவுகளும் கணிசமாகக் குறைக்கப்படுகிறது . இவ்வாறாக குறைந்த அளவிலான வரி மற்றும் உராய்வுச் செலவுகள் அவருடைய நிறுவனத்தின் மற்ற இரண்டு அகழிகளாகச் செயல்படுகின்றன .

2021 டிசம்பர் கணக்கீட்டின் படி அவருடைய Berkshire Hathaway முதலீட்டு நிறுவனத்தின் float 14700 கோடி டாலர்கள் . அப்போதைய இந்திய ரூபாய் மதிப்பில் 1107057 கோடி . தற்போது இந்த இலவசப்பணம் இன்னும் கூடியிருக்கும் . வேறு மாதிரி கூறுவதானால் வாரன் பஃபெட்டிற்கு 1107057 கோடி ரூபாய் 0 % என்ற வட்டி விகிதத்தில் கிடைக்கப்பெறுகிறது . ரொட்டியின் மேல் வைத்த வெண்ணெய் மாதிரி (icing on the cake) இந்தப் பணத்திற்கு முதலீட்டு வருவாயும் கிடைக்கிறது . இந்தப் பணத்தைக் கொண்டு பஃபெட் காப்பீட்டு நிறுவனங்கள் உட்பட பல நிறுவனங்களை மொத்தமாகவும் பங்குச்சந்தையில் பட்டியலிடப்பட்டிருக்கும் நிறுவனங்களைச் சில்லறைக் கணக்கிலுமாக வாங்கிச் சேர்க்கிறார் . GEICO  பங்குச்சந்தையில் பட்டியலிடப்பட்ட ஒரு முதன்மையான வாகனக் காப்பீட்டு நிறுவனமாகும் . பஃபெட் அந்த நிறுவனத்தைச் சிறுகச் சிறுக வாங்கி ஒரு கட்டத்தில் அதன் தவறான சில முடிவுகளின் காரணமாக அதன் பங்குகள் தரை தட்டும் போது மதிப்பு முதலீடாக ஆகப்பெரிய அளவுகளில் வாங்குகிறார் . தற்போது GEICO நிறுவனத்தின் நூறு சதவீதம் பங்குகளும் பஃபெட் வசம் உள்ளது . GEICO நிறுவனம் BRK ன் ஒரு அங்கமாகி விட்டது . பஃபெட்டின் மேலும் சில காப்பீட்டு நிறுவனங்களின் பட்டியல் .

General RE , National Indemnity Company , Medpro Group , Gateway Underwriters Company , Applied Underwriters , BRK Speciality Insurance , BRK Guard Insurance , United States Liability Insurance Group ...

இது தவிர சில்லறை முதலீடாக American Express , Apple , Coca Cola ... என்று முடிவேயில்லாத பல்துறை  நிறுவனங்களின் ஒரு பெரும் வரிசை உள்ளது .

பஃபெட்டின் BRK முதலீட்டு நிறுவனம் பங்குச்சந்தையில் 20 என்ற விலை - வருவாய் விகிதத்தில் (PE Multiple) வர்த்தகமாகிறது . பஃபெட் இந்தப் பங்குச்சந்தை புனைவுப் பணத்தைக் (virtual money) கொண்டு அதாவது தனது நிறுவனப் பங்குகளைக் கொடுத்து அவ்வப்போது பிற நிறுவனங்களை மதிப்பு முதலீடாகக் கையகப்படுத்துகிறார் . பஃபெட் தனது நிறுவனத்தைப் பங்குச்சந்தையில் பட்டியலிடாமல் இருந்திருந்தால் இந்தப் புனைவுப் பணம் அவருக்குக் கிடைக்கப் பெற்றிராது . Float மாதிரி இந்தப் பங்குச்சந்தை மெய்நிகர் பணமும் பஃபெட்டிற்கு வற்றாத ஒரு சுனையாகச் செயல்படுகிறது .

பஃபெட்டின் Berkshire Hathaway முதலீட்டு நிறுவனத்தைப் பின்வருமாறு விவரித்தால் பொருத்தமாக இருக்கும் என்று தோன்றுகிறது . ஒரு போதும் தீர்ந்து விடாத மிகப்பெரிய படுதாவில் பஃபெட் வரைந்து கொண்டிருக்கும் ஒரு ஓவியமாக BRK நிறுவனத்தைச் சொல்லலாம் . அந்த ஓவியத்தில் புதிதாக சிலவற்றைச் சேர்க்கிறார் . சிலவற்றை நீக்குகிறார் . அதன் வண்ணக் கலவையை மாற்றுகிறார் . பஃபெட்டின் காலத்திற்குள் அந்த ஓவியம் முற்றுப் பெறுமா என்று தெரியவில்லை . அந்த வகையில் அமேசான் மாதிரி தனிப்பட்ட ஒரு நிறுவனமாக இல்லாமல் பிற நிறுவன முதலீடுகள் மூலமாக உலகப் பணக்காரர் ஆகிய ஒரேயொருவர் வாரன் பஃபெட் என்று சொல்லலாம் . அவர் ஒப்பாரும் மிக்காரும் இல்லாத ஒருவர் .