உள்முக மதிப்பீடு

உள்முக மதிப்பீடு

INNER SCORECARD

உள்ளார்ந்த மதிப்பு என்று கேள்விப்பட்டிருக்கிறோம் . அது என்ன உள்முக மதிப்பீடு ?

வாரன் பஃபெட் அறிமுகப்படுத்திய இந்தக் கருத்தாக்கத்தை அவருடைய உதாரணம் ஒன்றின் மூலமாகப் புரிந்து கொள்ள முயலலாம் .

இரண்டு சூழ்நிலைகளைக் கற்பனை செய்து பாருங்கள் .

நீங்கள் உலகின் மிகச் சிறந்த காதலர் என்று மற்றவர்களால் நினைக்கப்படுகிறீர்கள் ஆனால் உண்மையில் நீங்கள் உலகின் மோசமான காதலர்களில் ஒருவர் .

நீங்கள் உலகின் மோசமான காதலர் என்று மற்றவர்களால் நினைக்கப்படுகிறீர்கள் ஆனால் உண்மையில் நீங்கள் உலகின் மிகச் சிறந்த காதலர்களில் ஒருவர் .

முதல் வகையில் இருந்தால் நீங்கள்
வெளிமுக மதிப்பீடு (Outer Scorecard) என்ற நிலையில் இருப்பதாக அர்த்தம் .

இரண்டாவது வகையில் இருந்தால் , கையைக் கொடுங்கள் , நீங்கள் உள்முக மதிப்பீடு என்ற நிலையில் இருக்கிறீர்கள். வாழ்த்துக்கள் .

மேற்சொன்ன சூழ்நிலையைப் பங்குச் சந்தைக்குப் பொருத்திப் பார்க்கலாம் .

நீங்கள் உலகின் மிகச் சிறந்த முதலீட்டாளர் என்று மற்றவர்களால் நினைக்கப்படுகிறீர்கள் ஆனால் உண்மையில் நீங்கள் உலகின் மோசமான முதலீட்டாளர்களில் ஒருவர் .

நீங்கள் உலகின் மோசமான முதலீட்டாளர்களில் ஒருவர் என்று மற்றவர்களால் நினைக்கப்படுகிறீர்கள் ஆனால் உண்மையில் நீங்கள் உலகின் மிகச் சிறந்த முதலீட்டாளர்களில் ஒருவர் .

முதலாமவர் வெளிமுக மதிப்பீடு என்ற நிலையில் இருக்கிறார் . அவரது உள்ளும் புறமும் வேறு வேறாக இருக்கிறது . இந்த வகைக்கான சிகர உதாரணமாக Bernie Madoff ஐ சொல்லலாம் . Bernie Madoff உலகின் ஆகப்பெரிய ஏமாற்றுத் திட்டத்தை (Ponzi Scheme) பல்லாண்டுகள் நடத்தியவர் . அவரைக் குறித்து இன்னொரு சந்தர்ப்பத்தில் பார்க்கலாம் .

இரண்டாமவர் உள்முக மதிப்பீடு என்ற நிலையில் இருக்கிறார் . மற்றவர்களின் பார்வை வேறு மாதிரி இருந்தாலும் அவரது உள்ளும் புறமும் ஒன்றாக இருக்கிறது . மேலும் மற்றவர்களின் அளவைக்கு அவர் முக்கியத்துவம் தருவதில்லை . அவர்களின் குறைப்பட்ட அளவைகள் அவரை எந்த விதத்திலும் பாதிப்பதில்லை .

வாரன் பஃபெட் குழு விவாதம் குறித்த என்னுடைய பார்வை என்பது கண்ணாடியைப் பார்ப்பது மட்டுமே என்று சொல்வதன் காரணம் இது தான் .

பங்குச்சந்தையில் வெற்றி பெற இந்த உள்முக மதிப்பீடு மிகவும் முக்கியமான ஒன்று .

பங்குச்சந்தையில் ஆயிரம் பேர் முதலீடு செய்கிறார்கள் என்றால் ஆயிரம் பேருக்கும் ஆயிரம் காரணங்கள் இருக்கும் . அவர்கள் சந்தையைப் பார்க்கும் பார்வைகள் மாறுபடும் . அவர்களின் பார்வை நம் பார்வையைப் பாதிப்பதற்கு நாம் இடம் கொடுக்கக் கூடாது .

Pidilite நிறுவனப் பங்கு ஒரு மீமிகை கரடிச்சந்தையின் போது வெறும் 150 ரூபாய்க்கு வர்த்தகமானது . அந்த விலையில் நீங்கள் உங்கள் சொத்து முழுவதையும் விற்று அந்தப் பங்கில் முதலீடு செய்யலாம் என்பதான ஒரு அரிதினும் அரிதான வாய்ப்பு . நீங்கள் வெளிமுக மதிப்பீடு செய்பவராக இருந்தால் அதாவது மற்றவர்களின் பார்வை உங்களின் பார்வையைப் பாதிக்கும் வகையில் இருந்தால் சந்தையின் போக்கில் நீங்களும் சென்று இந்த வாய்ப்பைத் தவற விட்டு விடுவீர்கள் .

ஒருவருக்கு நீண்ட காலம் என்பது ஒரு மாதம் மட்டுமாக இருக்கும் . வாரனுக்கு நீண்ட காலம் என்பது அவர் காலத்தையும் கடந்தது . ஒரு சிலருக்கு பன்மடங்காளர் (Multibagger) பங்கு என்பது பத்து மடங்கு என்பதாக இருக்கும் . பெரும்பாலோனோருக்கு அது இரண்டு மடங்கு . ஆனால் விப்ரோ பங்கு இன்றைய தேதியில் 2426360 மடங்காளர் . பஃபெட்டின் முதலீட்டு நிறுவனமான Berkshire Hathaway பங்கு இன்றைய தேதியில் 22903 மடங்காளர் . 

சந்தையில் ஒவ்வொருவருக்குமான அளவைகள் வேறுபடும் . மற்றவர்களின் அளவீடுகளை வைத்து நம் முதலீட்டு முடிவுகளை எடுக்கக்கூடாது .

அடிப்படைப் பகுப்பாய்வு செய்து ஒரு நிறுவனப் பங்கை வாங்கி வைத்திருக்கிறீர்கள் என்று கொள்ளலாம் . அந்த நிறுவனப் பங்கின் விலை சில பல காரணங்களால் குறைந்து விடுகிறது . வெளிமுக மதிப்பீடு செய்பவராக நீங்கள் இருந்தால் சந்தையின் போக்கில் சென்று அச்ச விற்பனையில் (panic selling) ஈடுபடுவதற்கான வாய்ப்புகள் அதிகம் . உள்முக மதிப்பீடு செய்பவராக இருந்தால் பங்கின் விலை குறையக் குறைய அதன் மதிப்பு கூடும் என்ற அடிப்படையில் நீங்கள் அந்தப் பங்குகளை வாங்குவதற்கான வாய்ப்புகள் அதிகம் .

வாரன் பஃபெட் புரிந்து கொள்ளக் கடினமான நிறுவனங்களில் முதலீட்டை மேற்கொள்ள மாட்டார் . அவரைப் பொறுத்தவரை புரிந்து கொள்ளக்கூடியதான ஒரு அடி உயர தடையைத் தாண்டும் நிறுவனங்களில் மட்டும் முதலீட்டை மேற்கொள்வார் . அவருடைய அலுவலகத்தில் Too Hard என்று எழுதி ஒட்டப்பட்டு ஒரு மூலையில் கிடக்கும் நிறுவன ஆண்டறிக்கை அட்டைப்பெட்டிகளை இன்றும் காணலாம் .

2000 ஆவது ஆண்டுத் தொடக்கம் தகவல் தொழில்நுட்பப் பங்குகள் உச்சத்தில் இருந்த நேரம் . IT நிறுவனப் பங்குகள் சர்வ சாதாரணமாக மூன்று இலக்க விலை வருவாய் விகிதங்களில் வர்த்தமாகிக் கொண்டிருந்த காலகட்டம் . வாரன் பஃபெட் அவரது திறமை வளையத்திற்கு (circle of competence) அப்பாற்பட்ட நிறுவனங்களில் எக்காரணம் கொண்டும் முதலீட்டை மேற்கொள்ள மாட்டார் . அவரது முதலீட்டு நிறுவனத்தின் 1999 ஆவது ஆண்டு வருமானம் - 20 சதவீதம் . ஆனால் S & P குறியீடு 1999 ஆம் ஆண்டு + 20 சதவீதம் கொடுத்தது . Dow Jones குறியீடு + 25 சதவீதம் . NASDAQ குறியீடு + 85 சதவீதம் . வாரன் பஃபெட்டை உலகம் அப்போது ஒரு மோசமான முதலீட்டாளர் என்பதாகப் பார்த்தது . What's wrong with Warren என்று பத்திரிகைகள் தலையங்கம் தீட்டின . தகவல் தொழில்நுட்பக் குமிழி 2000 ஆவது ஆண்டில் வெடித்துச் சிதறியது . வாரனின் முதலீட்டு நிறுவனம் அடுத்த மூன்று ஆண்டுகளுக்கு நேர்ம வருமானத்தை (positive return) ஈட்டியது . மற்ற மூன்று குறியீடுகளும் அடுத்த மூன்று ஆண்டுகளுக்கு எதிர்ம வருமானத்தைக் (negative return) கொடுத்தன . முதலீட்டுத் திட்டங்கள் மிகை அளவுகளில் ஏறி இறங்காது ஒரே சீரான (consistent) வருமானத்தைக் கொடுப்பதாக இருக்க வேண்டும் . ஒரு முதலீடு 50 சதவீதம் இழப்பைச் சந்திக்குமானால் அந்த இழப்பைச் சமன் செய்ய அது 100 சதவீதம் சம்பாதிக்க வேண்டும் . வாரனின் உள்முக மதிப்பீடு அவரது நிறுவனத்தையும் அதன் முதலீட்டாளர்களையும் காக்கும் அரணாக இருந்தது .

இப்போது அதிக எண்ணிக்கையிலான முதல் பொது வெளியீடுகள் (IPO) வெளியிடப்படுகின்றன . பொதுவாகக் காளைச் சந்தையில் தான் நிறைய முதல் பொது வெளியீடுகள் வெளியிடப்படும் .  

நான் முதல் பொது வெளியீடுகளில் பெரும்பாலும் பங்கு கொள்வதில்லை . என்னைப் பொறுத்தவரை குறைந்த பட்சமாக பத்தாண்டுகளுக்கான நிறுவனத்தின் இலாப நஷ்டக் கணக்குகள் பொது வெளியில் இருக்க வேண்டும் . மேலும் நிறுவனம் வருவாய் ஈட்டுவதாக இருக்கவேண்டும் . Earnings எனப்படும் E  இருந்தால் தான் EPS என்ற அளவீடு வரும் . அதைக் கொண்டு தான் PE ஐ கணக்கிட முடியும் . அதனினும் முக்கியமாக எனது தனிப்பட்ட பங்குச் சலிப்பான் என்ற அளவீட்டையும் அந்த நிறுவனம் வெற்றி கொள்ள வேண்டும் . இது தான் நிறுவனங்களைப் பொறுத்த எனது உள்முக மதிப்பீடு . மற்றவர்களின் மதிப்பீடுகளுக்காக  இதனை என்னால் ஒருபோதும் மாற்றிக் கொள்ள இயலாது . மேலும் இத்தனை தடை தாண்டும் ஓட்டங்களிலும் தேறி வரும் நிறுவனங்களை அவ்வப்போது மதிப்பு முதலீட்டு உத்தியிலும் பிற சமயங்களில் காலப் பன்மயமாக்கம் என்ற வகையிலும் வாங்குவது தான் எனது வழிமுறை .

வாரன் பஃபெட் சந்தைக் குறியீடுகளை ஒரு கணக்கீடு என்ற அடிப்படையில் மட்டும் பார்ப்பாரேயன்றி அதற்கு மிகுந்த முக்கியத்துவம் அளிக்க மாட்டார் . சென்செக்ஸ் முதலான சந்தைக் குறியீடுகளை வெல்ல வேண்டும் என்று கங்கணம் கட்டிக் கொண்டு செயல்பட்டால் நீங்கள் வெளிமுக மதிப்பீட்டாளர் . உண்மையில் நாம் வெல்ல வேண்டியது நம்மை மட்டுமே . நம்முடைய உணர்வுகளை மட்டுமே .

The investor's chief problem and his worst enemy is likely to be himself என்று கிரகாம் கூறியது கவனத்தில் கொள்ளத்தக்கது . முதலீட்டாளர்களின் முக்கியமான பிரச்னையும் மோசமான எதிரியும் அவர்களே .

காண்டேகரின் வைர வரிகளுடன் இந்தப் பதிவை நிறைவு செய்யலாம் .

வாழ்க்கை என்பது பூஞ்சோலை அல்ல . அது போர்க்களம் . இந்தப் போர்க்களத்தில் எதிரிகளோடு மட்டும் போராடினால் போதாது . நண்பர்களுக்கு எதிராகவும் வாளை உருவ வேண்டும் .இது மட்டும் அல்ல . சமயம் வந்தால் நம்மோடு நாமே போராட வேண்டும் . நம்மோடு நாமே போராடுவது , நம்மை நாமே தோற்கடிப்பது ! இவையெல்லாம் விந்தையாகத் தானே இருக்கின்றன ? விந்தை மட்டுமல்ல , உண்மையுங் கூடத்தான் . ஆதிசேஷனுக்கு ஆயிரம் தலைகள் இருப்பதாகப் புராணம் கூறுகிறது . அதுபோல மனிதனுக்கு ஆயிரம் மனங்கள் இருக்கின்றன .