ஒரு பங்குத்தொகுப்பிற்கு எத்தனை பங்குகள் தேவை ?

ஒரு பங்குத்தொகுப்பிற்கு எத்தனை பங்குகள் தேவை?

அது உங்களின் பார்வையைப் பொறுத்தது. ஒருவர் தன் வாழ்நாளில் இருபது பங்குகளை மட்டுமே வாங்க வேண்டும் என்பதாக வாரன் பஃபெட் கூறியிருக்கிறார். Walter Schloss என்கிற அமெரிக்க நிதி மேலாளர் ஒரே சமயத்தில் நூற்றுக்கணக்கான பங்குகளை வாங்கிப் பராமரித்திருக்கிறார். தனிப்பட்ட முறையில் நான் Walter Schloss பக்கம் தான். நீங்கள் மதிப்பு முதலீடாகப் பங்குகளை அடிப்படைப் பகுப்பாய்வு செய்து வாங்கி வந்தால் அத்தகைய பங்குகளைத் தினசரி கண்காணிக்க வேண்டிய தேவை எழாது. அதில் சில பங்குகள் 10 மடங்கு கூடலாம். மிகச் சில 20 மடங்கு...மிக மிகச் சில 50 மடங்கு...ஒன்றிரண்டு நிறுவனப் பங்குகள் 1000 மடங்கு ஏன் 10000 மடங்கு கூடக்கூடிய வாய்ப்புகள் உள்ளன. எது 10 மடங்காளர் எது 10000 மடங்காளர் என்று நமக்குத் தெரியாது. உங்கள் பங்குச் சலிப்பானில் (Stock Screener) எத்தனை பங்குகள் தேறி வருகிறதோ அத்தனையையும் வாங்குங்கள். மிகவும் முக்கியமாக எவ்வளவு தான் பார்த்துப் பார்த்து வாங்கினாலும் Cox & Kings மாதிரியான களைகள் அவ்வப்போது முளைத்த வண்ணமாகவே இருக்கும். அவைகளை புத்திக் கொள்முதல் என்பதாகக் கொள்ளுங்கள். அப்போதைக்கப்போது பங்கு ஈட்டு விகிதம் (Dividend Yield) அதிகம் கொடுக்கக்கூடிய பங்குகளிலும் முதலீடு செய்து வர நாளடைவில் பங்காதாயங்களின் பணப்பாய்ச்சல் (Cashflow) ஒன்று சுரக்கத் தொடங்கும். அந்தப் பணத்தையும் பங்குகளில் மறு முதலீடு செய்யுங்கள். அப்புறம் நான் பணத்தை எப்போது தான் அனுபவிப்பது என்கிறீர்களா ? ஐயா, இது உங்கள் பணம். நீங்கள் எப்போது வேண்டுமானாலும் எடுத்துக் கொள்ளலாம். ஆனால் எடுக்க வேண்டும் என்பதற்காக எடுக்காதீர்கள். தேவைக்கு எடுத்துக் கொள்ளுங்கள். மற்றபடி இந்தப் பயணத்தை அனுபவியுங்கள்.

அகல உழுவதை விட ஆழ உழுவதே மேல் என்பதாக ஒரு பழமொழி உண்டு. பங்குச்சந்தையைப் பொறுத்தவரை ஆழமாகவும் உழ வேண்டும். அகலமாகவும் உழ வேண்டும்.  ஒரு சில உதாரணங்கள் மூலமாகவும் இதே முடிவிற்கு வரப்பெறலாம். Cymbeline, Troilus and Cressida, Coriolanus என்ற நாடகங்களைப் பற்றிக் கேள்விப்பட்டிருக்கிறீர்களா? Hamlet, Romeo and Juliet, Macbeth? உடனே Shakespeare எழுதிய நாடகங்கள் என்று சொல்லி விடுவீர்கள். முதல் மூன்று நாடகங்களை எழுதியதும் Shakespeare தான். Shakespeare நிறைய நாடகங்களை எழுதியிருக்கிறார். அவற்றில் சில நாடகங்கள் உலகப்புகழ் பெற்றவை. பிக்காசோ குறித்து நீங்கள் கேள்விப்பட்டிருக்கலாம். அவருடைய போருக்கு எதிரான Guernica ஓவியம் உலகப்புகழ் பெற்றது. பிக்காசோ தன் வாழ்நாளில் நூற்றுக்கணக்கான ஓவியங்களை வரைந்திருக்கிறார். அவற்றில் Guernica மாதிரியான சில ஓவியங்கள் அவரைப் புகழின் உச்சிக்குக் கொண்டு சென்று விட்டன. உங்களுக்கு இந்தச் சம்பவங்களின் மையக் கருத்து புரிந்திருக்கும் என்று நம்புகிறேன். The best way to get a new idea is to have a lot of ideas. நிறைய உபாயங்களைக் கைவசம் வைத்திருப்பது  ஒரு புதிய உபாயத்தைக் கண்டடைவதற்கான சிறந்த வழியாகும்.

Long Tail என்ற கருத்தாக்கத்தின் மூலமாகவும் இதே முடிவிற்கு வரலாம். Long Tail என்பதை ஒரு நீண்ட L வடிவமாக உருவகித்துக் கொள்ளுங்கள். அந்த L ன் தலைப்பகுதியை பட்டையாகவும் போகப்போக அதன் வால் பகுதி சுருங்குவதாகவும் இருக்கிறது. அமேசான் நிறுவனம்  புத்தகங்களை விற்கிறது. Best sellers என்று அழைக்கப்படும் புத்தகங்கள் நிறைய எண்ணிக்கையில் விற்பனையாகும். அது L  ன் தலைப்பகுதி. நடுப்பகுதியில் உள்ள புத்தகங்கள் கொஞ்சம் குறைந்த எண்ணிக்கையில் விற்பனையாகும். வால் பகுதிப் புத்தகங்கள் இன்னும் குறைந்த எண்ணிக்கையில் விற்பனையாகும். அமேசானின் 57 சதவீத புத்தக விற்பனை இந்த வால் பகுதி விற்பனையின் மூலமாகக் கிடைக்கப்பெறுகிறது. இந்த Long Tail கருத்தாக்கத்தை பங்குச்சந்தைக்குப் பொருத்திப் பார்க்கலாம். தலைப்பகுதியில் Asian Paints, HCL Technologies முதலான Large Cap பங்குகள் உள்ளன. அப்புறம் Alkem Lab, PI Industries முதலான Mid Cap பங்குகள், NBCC, Piramal Pharma முதலான Small Cap பங்குகள்... இன்னும் சற்று கீழே Balmer Lawrie Investments முதலான Micro Cap மற்றும் Nano Cap பங்குகள் உள்ளன. நாம் இந்த எல்லா Cap நிறுவனங்களிலும் முதலீடு செய்தால் அமேசான் மாதிரி இந்த Long Tail ஐ பணமாக்கம் செய்யலாம். மிகவும் முக்கியமாக சிறு மற்றும் குறு நிறுவனங்களின் வளர்ச்சியில் தொடர்ந்து பங்கு பெறலாம். நேற்றைய சிறு நிறுவனங்கள் தான் நாளைய பெரு நிறுவனங்களாக உருமாற்றம் பெறுகின்றன என்பதை நினைவில் கொள்ளவும். 

Venture capital என்று அழைக்கப்படும் துணிகர முதலீட்டு நிதிகள் நிறைய நிறுவனங்களில் முதலீட்டை மேற்கொள்வதன் முதன்மையான காரணம் எது கூகுள் மாதிரி பன்மடங்காளர் என்பது முதலிலேயே தெரிய வராது என்பது தான். ஆக நிறையப் பங்குகளை வாங்குங்கள். அவற்றின் சில பன்மடங்காளர்கள் (Multibaggers) உங்களை நிதி விடுதலைக்கு இட்டுச்செல்லும். 

80/20 கருத்தாக்கத்தை நமது பங்குத் தொகுப்பிற்குப் பொருத்திப் பார்த்தாலும் இதே முடிவிற்குத் தான் வர வேண்டியதாக இருக்கும். நமது பங்குத் தொகுப்பின் 80 சதவீத வருமானம் 20 சதவீத பங்குகளிலிருந்து மட்டுமே கிடைக்கப்பெறும்.

முன்னரே கூறிய படி நீங்கள் வாங்கிய நிறுவனப்பங்குகளில் பாதி, சராசரி என்ற அளவில் தான் செயல்படும். சில நிறுவனங்கள் சராசரிக்கும் மேலாகச் செயல்படும். மிகச்சில நிறுவனங்கள் பன்மடங்காளராகி விடும். அனைத்து நிறுவனங்களின் சராசரி என்ற கணக்கீட்டின்படி நீங்கள் சந்தையை வெல்வதற்கான வாய்ப்புகள் பிரகாசம்.

பூவுலகின் மிகச்சிறந்த முதலீட்டாளரான பெஞ்சமின் கிரகாமின் பங்குகளின் வாயிலான பெரும்பான்மையான வருமானம் GEICO நிறுவனம் மூலமாக மட்டுமே கிடைக்கப்பெற்றது. அவருடைய மாணாக்கராகிய வாரன் பஃபெட்டின் பன்மடங்குப் பங்கும் அதே GEICO நிறுவனம் என்பது இங்கே குறிப்பிடத்தக்கது.

அண்மை உதாரணம் ஒன்றையும் பார்த்து விடலாம். டாடா சன்ஸ் நிறுவனத்தின் பெரும்பான்மையான வருமானம் TCS மூலமாக மட்டுமே கிடைக்கப்பெறுகிறது.

நிறுவனங்களின் சராசரி வயது தற்போது குறைந்து கொண்டே வருகிறது. அமெரிக்க Dow Jones குறியீட்டில் அதன் ஆரம்ப காலத்திலிருந்து இடம் பெற்ற ஒரேயொரு நிறுவனமாக General Electric இருந்தது. தற்போது அதுவும் அந்தக் குறியீட்டிலிருந்து நீக்கப்பட்டு விட்டது. ஆக்க அழிவு என்று சொல்லப்படும் Creative Destruction தன் வேலையைச் செவ்வனே செய்து விடுகிறது. இதற்காகவேனும் புதிய புதிய நிறுவனங்களை இனங்கண்டு முதலீடு செய்வது காலத்தின் கட்டாயமாகிறது. 

ஆக, அடிப்படைப் பகுப்பாய்வு செய்து மதிப்பு முதலீடாக நிறுவனப் பங்குகளை வாங்குங்கள். அவற்றில் சில பங்குகள் வைரங்களாக உருமாற்றம் பெறும். மிகச்சில பங்குகள் கோகினூர் வைரங்களாக ஜொலிக்கும்.