சிறிதே பெரிது - 1

சிறிதே பெரிது - 1

வாரன் பஃபெட், சிறிய முதலீட்டாளராக இருப்பது ஒரு சாதகமான கட்டமைப்பு (structural advantage) என்பதாகக் கூறுகிறார். அவருடைய முதலீட்டு நிறுவனமான  Berkshire Hathaway சிறியதாக இருந்த போது கிடைத்த முதலீட்டு வாய்ப்புகளும்,  முதலீட்டுப் பலன்களும் பெரிய நிறுவனமாக வளர்ந்த பின்பு கிட்டாததைச் சுட்டிக் காட்டுகிறார். 

ஒரு கோடி ரூபாயில் ஒரு சதவீதம் என்பது ஒரு இலட்சம். நூறு கோடி ரூபாயில் ஒரு சதவீதம் என்பது ஒரு கோடி. ஆயிரம் கோடி ரூபாயில் ஒரு சதவீதம் என்பது பத்து கோடி. உங்கள் முதலீடு ஆயிரம் கோடியாக வளர்ந்த பின்பு அதன் ஒரு சதவீதமான பத்து கோடியை ஒரு நிறுவனத்தில் முதலீடு செய்தால், பங்குச்சந்தையில் அதனுடைய தாக்கத்தைச் சற்று யோசித்துப் பாருங்கள். 

பங்குகளை வாங்கும் போது, பங்குகளுக்கான தேவைப்பாடு (demand) அதிகரிப்பதால் பங்கின் விலை ஏறி விடும். விற்கும் போது வழங்கல் (supply) அதிகரிப்பதால் பங்கின் விலை குறைந்து விடும். அதிக விலைக்குப் பங்குகளை வாங்குவதும், குறைந்த விலைக்குப் பங்குகளை விற்பதும் buy low, sell high என்ற தாரக மந்திரத்திற்கு எதிரானது. 

வாரன் பஃபெட் அவருடைய முதலீட்டு நிறுவனத்தின் சொத்து ஒதுக்கீட்டில் (asset allocation) கடன் பத்திர முதலீட்டைக் கூட்ட வேண்டிய ஒரு சூழ்நிலை ஏற்பட்ட போது அவர் முன்னே இரண்டு வாய்ப்புகள் இருந்தன. ஒன்று, பங்குகளை விற்று விட்டு கடன் பத்திரங்களை வாங்குவது. இரண்டாவது, கடன் பத்திர முதலீடுகள் அதிகமாகவுள்ள மற்றொரு நிறுவனத்தைத் தன் முதலீட்டு நிறுவனத்துடன் இணைப்பது‌. கடைசியில் இந்த இணைப்பைத் தான் மேற்கொண்டார். ஒரே கல்லில் மூன்று மாங்காய். பங்கு முதலீட்டைக் குறைத்துக் கொண்டாகி விட்டது. கடன் பத்திர முதலீட்டைக் கூட்டிக் கொண்டாகி விட்டது. புதிய நிறுவனத்தை வாங்கியாகி விட்டது. ஆனால் சந்தையில் ஒரு பங்கைக் கூட விற்கவில்லை. அவரால்  விற்கவும் முடியாது. தாக்கச்செலவு (impact cost) மிக அதிகம். 

Capital Cities நிறுவனத்தின் ஒரு குறிப்பிட்ட அளவு பங்குகளை, பங்குகளைத் திரும்ப வாங்குதல் (buyback) முறையில் அந்த நிறுவனத்திற்கே விற்றார். சந்தையில் விற்கவில்லை. தாக்கச்செலவு‌. 

மைக்ரோசாப்ட் நிறுவனப்பங்குகள் சமீப காலமாக விலையேறாததற்கு, பில்கேட்ஸ் தன்னுடைய அறக்கட்டளைக்கு நிதி திரட்டும் வகையில் மைக்ரோசாப்ட் பங்குகளைத் தொடர்ந்து விற்றுக் கொண்டிருப்பதைக் காரணமாகக் குறிப்பிடுகிறார்கள். 

சிறிய முதலீட்டாளர்களுக்கு இந்தக் கவலையெல்லாம் இல்லை. நினைத்த போது வாங்கலாம். நினைத்த போது விற்கலாம். மன்னிக்கவும், ஒரு பேச்சுக்குச் சொன்னேன். பங்குகளை விற்க முடியும், வாங்க முடியும் என்ற சுதந்திரம் இருப்பதற்காக பங்குகளை விற்கவோ வாங்கவோ கூடாது. சுதந்திரம்= பொறுப்பு. மாபெரும் சுதந்திரம் என்றால் மாபெரும் பொறுப்பு. பங்குகளைப் பல்லாண்டுகள் பொறுப்பாக வைத்திருப்பதன் மூலமாக மட்டுமே பங்குச்சந்தையில் பணம் சம்பாதிக்க முடியும். 

பங்குச்சந்தையில் பட்டியலிடப்பட்டதில் இருந்து Motherson Sumi Systems நிறுவனப் பங்கு 2295 மடங்கு முதலீட்டுப் பெருக்கத்தை அடைந்திருக்கிறது. 2021 ஆம் ஆண்டுக்கான பங்கு ஈட்டு விகிதம் அதன் பட்டியல் விலையான ( Listing price) 41 ரூபாய்க்கு 1407 சதவீதம். 

பங்குகளை வருமானம் ஈட்டக்கூடிய ஒரு நபராகப் பாவியுங்கள். வருமானம் ஈட்டக்கூடிய ஒரு நபரை எவ்விதம் பொறுப்பாகப் பார்த்துக் கொள்வோம்? அதே மாதிரி பங்குகளையும் பார்த்துப் பார்த்து வாங்குங்கள். காலா காலத்திற்கும் வைத்திருங்கள். BUY RIGHT AND SIT TIGHT. 

மேலும் படிக்க : சிறிதே பெரிது - 2

சிறு முதலீட்டாளர்களின் பங்குப் பன்மயமாக்கம் (diversity) பெரு முதலீட்டாளர்களுக்குக் கிடையாது. மைக்ரோசாப்ட் நிறுவனத்தின் வருமானம் முழுவதும் மென்பொருளிலிருந்து தான் கிடைக்கிறது. அந்த வகையில் முதலீட்டு நிறுவனமான Berkshireன் கட்டுமான அமைப்பு பங்குப் பன்மயமாக்கத்திற்குச் சாதகமாக அமைந்து விட்டது. இந்த இடத்தில் இன்னொரு விஷயத்தைக் குறிப்பிட்டாக வேண்டும். உலகப் பணக்காரர்கள் பட்டியலில் நீங்கள் இடம் பெற வேண்டுமென்றால் ஒரு நிறுவனத்தைத் தொடங்கி, அதனைப் பங்குச்சந்தையில் பட்டியலிட்டு, நீண்ட கால நோக்கில் அதனை இலாபகரமாக நடத்தினால் மட்டுமே சாத்தியமாகும். பில்கேட்ஸ், மைக்ரோசாப்ட் நிறுவனத்தின் மூலமாக பணக்காரராகியிருக்கிறார். கூகுள் இரட்டையர்கள், கூகுள் தேடுபொறியின் மூலமாக... இவ்வாறாக உலகப் பணக்காரர்கள் அனைவரும் தங்களது நிறுவனங்களைப் பங்குச்சந்தையில் பட்டியலிட்டதன் மூலமாக மட்டுமே உலகப் பணக்காரர்களாக உருவாகியிருக்கிறார்கள். எல்லோராலும் இந்த மாதிரி ஒரு நிறுவனத்தைத் தொடங்கி நடத்துவது என்பது சாத்தியமில்லை. இதில் வாரன் பஃபெட் மட்டும் தனித்துவமாக மற்ற நிறுவனப்பங்குகளில் முதலீடு செய்வதன் மூலமாக மட்டுமே உலகப் பணக்காரர்களில் ஒப்பாரும் மிக்காரும் இல்லாத ஒருவராகி இருக்கிறார். அந்த அடிப்படையில் பங்குச்சந்தை முதலீட்டாளர்களுக்கு அவர் ஒரு உந்து சக்தியாக, வழி காட்டும் ஒரு துருவ நட்சத்திரமாக ஜொலித்துக் கொண்டிருக்கிறார். 

பங்குச்சந்தையில் சிறு முதலீட்டாளராக இருப்பதற்காக தாழ்வாகவெல்லாம் எண்ணிக்கொள்ள வேண்டாம். நீங்கள் பங்குச்சந்தையில் ஒரேயொரு HDFC பங்கை வைத்திருக்கும் ஒரு சின்னஞ்சிறு முதலீட்டாளராக ' இருந்தாலும்' போதும். பங்குச்சந்தை என்ற இந்த விளையாட்டில் ' இருப்பது' மட்டுமே மிக முக்கியம். மற்றபடி ஒரு பங்கோ அல்லது நூறு பங்கோ என்பது முக்கியமில்லை. இன்னும் சொல்லப்போனால் ஒன்றும் நூறும் ஒன்று தான். அதாவது 1=100. பங்குச்சந்தையில் இந்த மாதிரி தவறான சமன்பாடுகள் சரியாகி விடுவதுண்டு. இது எவ்விதம் சாத்தியமெனில் 1977 ஆம் வருடம் நீங்கள் ஒரேயொரு HDFC பங்கை 77 ரூபாய்க்கு வாங்கி இன்றைய தேதி வரை வைத்து ' இருந்தாலே' போதும். அந்த ஒரேயொரு பங்கு, பங்குப் பிரிப்பு மற்றும் இலவசப்பங்கு வெளியீட்டின் மூலமாக நூறு பங்குகளாகப் பல்கிப் பெருகியிருக்கும். ஒரு பங்கின் இன்றைய விலை ரூ.2560. உங்கள் ஆரம்ப முதலீடான 77 ரூபாய் 3324 மடங்கு பெருகி ரூபாய் 256000 ஆக மலர்ந்திருக்கிறது.  2021ஆம் வருடத்திற்கான பங்காதாயம் 2300 ரூபாய் . உங்கள் ஆரம்ப முதலீடான 77 ரூபாயைப் போல் 39 மடங்கு பங்காதாயம் மூலமாகக் கிடைத்திருக்கிறது . 

ஒரு மரத்தை நட சிறந்த நேரம் 44 வருடங்களுக்கு முன்பு இருந்தது. இரண்டாவது சிறந்த நேரம் இப்போது...