தெரிந்து கொள்வோம் - 2

தெரிந்து கொள்வோம் - 2

1. Invisible Hand:

ஆடம் ஸ்மித் சொன்ன காலத்தை வென்ற கருத்தாக்கம் இது. ஒரு சுதந்திர சந்தை (free market) ஒவ்வொரு நுகர்வோரும் தனக்கு என்ன வேண்டும் மற்றும் என்ன விலை கொடுத்து அதனை வாங்க வேண்டும் என்பதைத் தீர்மானிக்கும் சுதந்திரத்தை வழங்குகிறது. அதே மாதிரி ஒவ்வொரு விற்பனையாளரும் எதனை விற்பது மற்றும் என்ன விலைக்கு என்பதை முடிவு செய்வதற்கான சுதந்திரத்தையும் வழங்குகிறது. இவ்வாறாக தேவைப்பாடும் வழங்கலும் (demand and supply) பொருட்கள் மற்றும் விலை சார்ந்து சமநிலை ஒன்றை வந்தடைகின்றன. இது சமூகம் முழுமைக்கும் பயன் தருகிறது. மிகவும் முக்கியமாக இந்த செயல்பாடுகள் அனைத்தும் அரசாங்கம் உள்ளிட்ட எந்த அமைப்பும் ஆணையிடாமல் தன்னளவில் செய்யப்படுகின்றன. கட்புலனாகாத 'மாயக்கரம்' ஒன்று இதனைக் கட்டுப்படுத்துவதாகத் தோன்றுகிறது. ஒரு சின்ன உதாரணம் மூலமாக இதனைப் புரிந்து கொள்ளலாம். அடுமனை (Bakery) ஒன்றில் 20 ரூபாய் மதிப்புள்ள ரொட்டி அடுக்கு 40 ரூபாய்க்கு விற்கப்படுவதாக வைத்துக் கொள்வோம்.  இன்னொரு அடுமனை இலாபத்திற்கு ஒரு வாய்ப்பு இருப்பதை உணர்ந்து 30 ரூபாய்க்கு ரொட்டி அடுக்கை விற்க முனைகிறது. நுகர்வோர் 30 ரூபாய் ரொட்டியை வாங்குவதால் 40 ரூபாய்க்கு ரொட்டியை விற்கும் அடுமனையும் விலையைக் குறைக்கிறது. இவ்வாறு தேவையும் அளிப்பும் சமநிலையை அடைகின்றன. அரசாங்கத்தின் தலையீடு இல்லாமல் மாயக்கரம் ஒன்று இதனைச் செய்து முடிக்கிறது. அதே மாதிரி ஒரு பொருள், குறை அளிப்பில் (short supply) இருந்தாலும் நிறுவனங்கள் இந்த இடைவெளியை இனங்கண்டு அது சார்ந்த தொழிலில் முதலீடு செய்வதால் அளிப்பு தேவைக்கேற்ப அதிகரித்தும் சமநிலை அடையப்படுகிறது. சுதந்திரமான சந்தை இல்லாவிட்டால் என்ன நடக்கிறது என்றும் பார்த்து விடுவோம். அரசாங்கம், ஆணி தயாரிப்பு உட்பட ஒவ்வொரு சின்ன விஷயத்திலும் மூக்கை நுழைப்பதாகக் கொள்ளலாம். ஒரு இடத்தில் ஆணி மலையாகக் குவிந்து கிடக்கும். இன்னொரு இடத்தில் ஆணி இல்லாமல் நிறைய வேலைகள் முடங்கிக் கிடக்கும்.

2. Limited Liability:

British Petroleum நிறுவனம் கடலில் எண்ணையைக் கொட்டிய ஒரு மிகப்பெரிய விபத்து குறித்து நீங்கள் கேள்விப்பட்டிருக்கலாம். நீங்கள் BP பங்குதாரராக இருக்கும் பட்சத்தில் அரசாங்கம் இந்த விபத்திற்காக உங்களைக் கைது செய்யவோ அல்லது நஷ்ட ஈடு கேட்கவோ செய்யாது. அது BP நிறுவனர்களின் பொறுப்பு. மிஞ்சி மிஞ்சிப் போனால் பங்கின் விலை பூஜ்யமாகி நீங்கள் உங்கள் முதலீட்டை இழக்க வேண்டி வரும். இது Limited liability என்பதாக அழைக்கப்படுகிறது. பங்குச்சந்தை முதலீட்டின் ஒரு மிக முக்கியமான கருத்தாக்கம் இந்த 'வரையறுக்கப்பட்ட பொறுப்பு' என்பதை நினைவில் கொள்ளவும். இது மட்டும் இல்லையென்றால் பங்குச்சந்தையில் யாரும் முதலீடு செய்யத் துணிய மாட்டார்கள்.  இந்த எண்ணைய்த் தெறிப்பு காரணமாக BP நிறுவனப்பங்குகளின் விலை சரியலாம். நீங்கள் அதன் பங்குதாரராக இருக்கும் பட்சத்தில் நிறுவனத்திற்கான நஷ்டம் நிறைய இருக்கும் என்ற எண்ணம் கொண்டிருந்தால் பங்குகளை விற்று விட்டு வெளியேறி விடலாம். அல்லது நஷ்டம் ஒரு அளவுக்கு உட்பட்டு இருக்கும் என்று எண்ணினால், மேலும், பங்குகளின் விலை தரையைத் தட்டினால் மதிப்பு முதலீடாக அவற்றை வாங்கவும் செய்யலாம். நிறுவனங்களுக்கு திவால் நிலை பாதுகாப்பு (bankruptcy protection) இருப்பதையும் கவனத்தில் கொள்ளவும்.

3. Freak Trading:

பங்குச்சந்தை வர்த்தகர், தரவு (data) களைத் தவறாக உள்ளீடு (Input) செய்வது Freak Trading அல்லது Fat Finger Trading என்பதாக அழைக்கப்படுகிறது. தமிழில் இதனைத் தடுமாற்ற வர்த்தகம் என்று சொல்லலாம். ரிலையன்ஸ் இண்டஸ்ட்ரீஸ் நிறுவனப்பங்கு 1200 ரூபாய்க்கு வர்த்தகமாவதாகக் கொள்ளலாம். ரிலையன்ஸ் இண்டஸ்ட்ரீஸ் நிறுவனம் sensex குறியீட்டில் 13 சதவீத பங்களிப்பைக் கொண்டிருக்கிறது. வர்த்தகர் ஒருவர் 1000 பங்குகளை விற்பதாக உள்ளீடு செய்வதற்கு மாறாக, தவறுதலாக ஒரு இரண்டு பூஜ்யங்களைச் சேர்த்துத் தட்டி விடுகிறார். இந்த ஒரு இலட்சம் விற்பனைகளும் (sell order) ஒரு இலட்சம் வாங்குதல்களுடன் (buy order) இணக்கம் (match) ஆகும் வரை இந்த வர்த்தகம் அதன் போக்கில் செல்லும். ரிலையன்ஸ் பங்குகளின் விலை ரூபாய் 1100 ... 1000 ... 900 ... 800 ... என்பதாகக் குறைந்து விடும். ரிலையன்ஸில் 13 சதவீத பங்களிப்பைக் கொண்ட  Sensex குறியீடும் குறைந்து விடும். 2013 ஜனவரியில் Emkay Global நிறுவனம், நிறுவன முதலீட்டாளர் ஒருவரின் சார்பாக 65 கோடி மதிப்பிலான Nifty குறியீடுகளை விற்க முனைகையில் தவறுதலாக ஒரு பூஜ்யத்தைச் சேர்த்து 650 கோடிக்கு விற்பனை உள்ளீடு செய்யப்பட்டது. சந்தை circuit breaker என்ற அடிப்படையில் மூடப்பட்டது. முதலீட்டாளர்களின் பணம் 3 இலட்சம் கோடி வினாடிகளில் மாயமானது. 

4. Circuit Breaker:

Circuit breaker என்பது மின் சாதனங்களில் பாதுகாப்பு காரணங்களுக்காக  மின்சாரத்தைத் தானாகத் தடை செய்யும் ஒரு கருவி. பங்குச்சந்தையிலும் circuit breaker உண்டு (தமிழில் சுற்றுத் தகர்ப்பான் என்று சொன்னால் அடிக்க வருவீர்கள்) முதலீட்டாளர்களின் உணர்வுகளைக் கட்டுப்படுத்துவதற்காக இது ஏற்படுத்தப்பட்டது. பங்குச்சந்தையில் ஒரு Freak trading நடந்து விட்டதாகக் கொள்ளலாம். எல்லா முதலீட்டாளர்களுக்கும் என்ன நடந்தது என்று தெரிவதற்கான வாய்ப்பு இல்லை. முதலீட்டாளர்கள் அச்ச உணர்வு காரணமாகப் பங்குகளை விற்கத் தொடங்கினால் அச்ச விற்பனையின் நேர் பின்னூட்ட வளையம் (Positive feedback loop) ஒன்று முடிவேயில்லாமல் செயல்படத் தொடங்கி விடும். இதைத் தவிர்ப்பதன் பொருட்டு circuit breaker செயல்படுகிறது. சந்தை 10 சதவீதம் விழுந்தால் circuit breaker  செயல்பட்டு வர்த்தகம் நிறுத்தப்பட்டு விடும். அதே மாதிரி சந்தை மிதமிஞ்சிக் கூடினாலும் circuit breaker செயல்பட்டு வர்த்தகம் நிறுத்தப்பட்டு விடும்.  முதலீட்டாளர்கள் நின்று நிதானமாகி தன்னிலை அடைய ஒரு வாய்ப்பை அளிக்கும் விதமாக circuit breaker கள் செயல்படுகின்றன.

5. Systemic & Non Systemic Risk:

2000 ஆம் ஆண்டு உலகமெங்கும் உள்ள பங்குச்சந்தைகளில் தகவல் தொழில்நுட்பக் குமிழி (IT Bubble) வெடித்துச் சிதறியது . அதற்கு சில ஆண்டுகள் முன்னதாக இன்ஃபோசிஸ் உள்ளிட்ட IT நிறுவனங்கள் வருடத்திற்கு 50 க்கும் மேலான CAGR என்ற அளவீட்டில் வளர்ந்து வந்திருந்தன. சிறு நிறுவனங்கள் குறைந்த தளத்தில் (base) வருடத்திற்கு 50 சதவீத அளவில் வளர்வது எளிது. அதிகரித்து வரும் தளங்களில் இவ்விதம் வளர முடியாது. சராசரியை நோக்கிய பின்னடைவு (reversion to the mean) புவியீர்ப்பு விசை மாதிரி செயல்பட்டு நிறுவன வளர்ச்சியைக் கட்டுப்படுத்தி விடும். வேறு ஒரு கணக்கீட்டின் வழியாகவும் இந்த முடிவுக்கு வரலாம். தகவல் தொழில்நுட்ப நிறுவனங்கள் தொடர்ந்தவாக்கில் 50 சதவீத CAGR என்று வளர்ந்து வந்தால் ஒரு கட்டத்தில் இந்தியப் பங்குச்சந்தை மதிப்பில் (market cap) 50 சதவீதத்தை ஏன் அதற்கும் மேலாக இந்த நிறுவனங்கள் கைப்பற்றி விடும். இது சாத்தியமில்லாதது. முதலீட்டாளர்கள் இந்த எளிய கணக்கில் கோட்டை விட்டதால் IT குமிழி வளர்ந்து பின்னர் வெடித்தது. இது systemic risk என்பதாக அழைக்கப்படுகிறது. அதாவது ஒரு துறை சார்ந்த அனைத்து நிறுவனங்களுக்குமான பாதிப்பு. தமிழில் அமைப்பு சார் ஆபத்து என்று இதனைக் குறிப்பிடலாம். மாறாக 2009 ல் சத்யம் கம்ப்யூட்டர் நிறுவனத்தின் கற்பனைக் கணக்கு விவகாரம் non systemic risk ன் பாற்பட்டதாகும். அது ஒரு நிறுவனம் மட்டும் சார்ந்த பிரச்னையைக் குறிப்பது. அமைப்பு சாரா ஆபத்து.