பங்குச்சந்தையின் ஏற்ற இறக்கத்தை எவ்விதம் எதிர்கொள்வது ?

பங்குச்சந்தையின் ஏற்ற இறக்கத்தை எவ்விதம் எதிர் கொள்வது ?

பங்குச்சந்தையில் , அதில் பட்டியலிடப்பட்ட பங்குகளின் ஏற்ற இறக்கங்களில் கவனம் கொள்ளாமல் இருப்பது இந்த ஏற்ற இறக்கங்களை வெற்றி கொள்வதற்கான உன்னதமான ஒரு வழிமுறையாகும் . நிறுவனப் பங்கு ஒன்றை உதாரணமாகக் கொண்டு இதனைப் புரிந்து கொள்ளலாம் . நான் 2008 ஆம் ஆண்டு 2100 ரூபாய்க்கு வாங்கிய ஐம்பது V Guard நிறுவனப்பங்குகளுக்கான பங்காதாயப் பட்டியல் ...

ஆண்டு - பங்காதாயம் - பங்கு ஈட்டு விகிதம்

Year - Dividend - Dividend Yield 

2008 - Rs.125 - 5.95 %

2009 - Rs.125 - 5.95 %

2010 - Rs.150 - 7.14 %

2011 - Rs.175 - 8.33 %

2012 - Rs.175 - 8.33 %

2013 - Rs.175 - 8.33 %

2014 - Rs.225 - 10.71 %

2015 - Rs.225 - 10.71 %

2016 - Rs.350 - 16.66 %

2017 - Rs.350 - 16.66 %

2018 - Rs.490 - 23.33 %

2019 - Rs.560 - 26.66 %

2020 - Rs.630 - 30 %

2021 - Rs.840 - 40 %

2022 - Rs.910 - 43.33 %

2023 - Rs.910 - 43.33 %

2024 - Rs.980 - 46.66 %

பங்காதாயம் ஒரே சீராக உயர்ந்து வரும் பாங்கைக் கவனியுங்கள் . நாளும் ஏறி இறங்கும் பங்கின் விலை வெறும் இரைச்சல் (noise) ஒரே சீராக உயர்ந்து வரும் பங்கு ஈட்டு விகிதம் ஒரு குறீயீடு (signal) இரைச்சலில் கவனத்தைச் சிதற விடாது குறியீட்டில் கவனம் கொள்ளுங்கள் . இன்றைய தேதியில் ஆண்டுக்கு 46.66 சதவீதம் வருமானம் தரும் ஒரு பங்கிற்கான தேவைப்பாடு அதிக அளவில் இருக்கும் என்பது கண்கூடு . ஒரு பங்கிற்கான தேவைப்பாடு அதிக அளவில் இருக்கிறதென்றால் அதன் விலை கூட வேண்டும் . V Guard பங்கின் விலை நான் வாங்கிய விலையிலிருந்து கணிசமாகக் கூடியிருக்கிறது . நிறுவனம் வழங்கிய 10:1 பங்குப் பிரிப்பு மற்றும் 2:5 இலவசப் பங்களிப்பைக் கணக்கில் கொண்ட எனக்கான ஒரு பங்கின் விலை 3 ரூபாய் . V Guard பங்கின் தற்போதைய விலை 461 ரூபாய் . V Guard நிறுவனப்பங்கு நான் வாங்கிய விலையிலிருந்து 153 மடங்கு கூடியிருக்கிறது . 2008 ஆம் ஆண்டிலிருந்து சந்தை எவ்வளவு கொந்தளிப்புகளுக்கு உள்ளாகியிருக்கும் என்று சற்றே யோசித்துப் பாருங்கள் . இந்தக் கூச்சல்களில் கவனம் கொள்ளாது நிறுவனத்தின் செயல்பாடுகளில் ஆர்வம் கொள்ளுங்கள் . உயர்ந்து வரும் பங்கு ஈட்டு விகிதம் நிறுவனம் நன்கு செயல்படுவதற்கான மறைமுகமான ஆதாரமாகும் . உயர்ந்து வரும் பங்காதாயங்களை நிறுவனம் வழங்கினாலும் அதன் பங்காதாய வழங்கல் விகிதம் (dividend payout ratio) கட்டுக்குள் இருக்கிறது . இந்தியாவின் தென் கோடியில் வேர் கொண்ட நிறுவனம் இப்போது நாடு முழுவதும் தன் கிளைகளை விரித்திருக்கிறது . Stabilizer மட்டும் தயாரித்த நிறுவனம் இப்போது காற்றாடிகள் , சமையல் உபகரணங்கள் , நீர் சுத்திகரிப்பான் , நீர் கொதிகலன் , குளிர்விப்பான் (cooler) நிலைமின்மாற்றி  (inverter) உள்ளிட்ட மின் சாதனங்களை உற்பத்தி செய்கிறது . அது இன்னும் செல்ல வேண்டிய தூரங்கள் அடைய வேண்டிய சிகரங்கள் ஏராளம் உள்ளது .

V Guard பங்கின் பட்டியல் வாழ்க்கை சிறியது . 1976 ஆம் ஆண்டில் வெளி வந்த ITC நிறுவனத்தின் IPO முதலீட்டுக்கான தற்போதைய பங்கு ஈட்டு விகிதம் எவ்வளவு தெரியுமா ? அது 37867 சதவீதம் . அதன் மூலதனப் பெருக்கம் 14073 மடங்கு . 

பங்குச்சந்தையில் பட்டியலிடப்பட்ட அனைத்துப் பங்குகளையும் இந்தக் கண்ணோட்டத்தில் பாருங்கள் . இன்னும் சொல்லப்போனால் பங்குச்சந்தையின் அடிப்படையே இந்தப் பங்கு ஈட்டு விகிதம் மற்றும் அதன் மூலமான பங்குகளின் மூலதனப்பெருக்கம் என்ற இரண்டில் அடங்கி விடுகிறது . 

இவ்வாறு பங்குச்சந்தை எளிமையானது தான் . ஆனால் இந்த ஞானத்தைப் பெறுவது கடினமானது .