தலைகீழ் விகிதங்கள் - 3

தலைகீழ் விகிதங்கள் - 3

(i) 140 < 10

(ii) 1 + 29 = 40

(iii) 2 - 1 = 2

(iv) 2 - 1 = 0

மேலே உள்ள சமன்பாடுகள் இடுகைப் பிழைகள் இல்லை . பங்குச்சந்தையில் தினசரி நாம் இத்தகைய கணக்குகளை எதிர் கொள்ளலாம் . ஒவ்வொரு கணக்கையும் உதாரணம் ஒன்றுடன் பார்க்கலாம் .

(i) 140 < 10

Infosys பங்கு ஒன்றின் விலை 2008 ஆம் ஆண்டில் 140 ரூபாய் என்ற விலையில் (இலவசப்பங்கு மற்றும் பங்குப்பிரிப்பைக் கணக்கில் கொண்டது) வர்த்தகமானது . இதே 2008 ஆம் ஆண்டு Avon Corporation விரிவாக்கத்தின் பொருட்டு நிதி திரட்ட பங்குச்சந்தைக்கு வந்தது . முதல் பொது வெளியீட்டில் 10 ரூபாய் முக மதிப்பைக் கொண்ட பங்கு , முக மதிப்பு விலையிலேயே வெளியிடப்பட்டது . பத்து Infosys பங்குகளை வாங்குவதற்குப் பதிலாக Avon நிறுவனத்தின் 140 பங்குகளை வாங்கி விடலாம் . நிறுவனம் ஒரேயொரு ரூபாய் பங்காதாயம் வழங்கினால் 140 பங்குகளுக்கு 140 ரூபாய் கிடைக்கும் . பங்குகளை இவ்வாறு முக மதிப்பில் வாங்கினால் பங்காதாயமும் பங்கு ஈட்டு விகிதமும் சமம் . 2024 ஆம் ஆண்டுக்கு வாருங்கள் . Infosys பங்கு தற்போது 1420 ரூபாய்க்கு வர்த்தகமாகிறது . 2008 ஆம் ஆண்டு வாங்கிய 10 Infosys பங்குகள் , அது வழங்கிய இலவசப்பங்கு வெளியீடுகளுக்குப் பின்னர் 80 பங்குகள் ஆகியிருக்கும் . 80 பங்குகளின் விலை 113600 ரூபாய் . 2008 ஆம் ஆண்டு நாம் பத்து  Infosys பங்குகளை வாங்கிய விலையான 1400 ரூபாயைக் கொண்டு கணக்கிட்டால் அது 81 மடங்கு கூடியிருக்கிறது . 10 ரூபாய் பங்கு பங்குச்சந்தை பட்டியலிலிருந்து நீக்கப்பட்டு விட்டது . Infosys நிறுவனப் பங்கு 140 ரூபாய் என்ற விலையில் 10 ரூபாய் பங்கை விட மலிவு.

(ii) 1 + 29 = 40

Motherson Sumi Systems , வாகன உதிரி பாகங்கள் தயாரிக்கும் நிறுவனம் . இதுவரை 29 நிறுவனங்களை adjacent possible என்ற அடிப்படையில் (வாகன உதிரி பாகங்கள் சம்பந்தப்பட்ட நிறுவனங்களை மட்டும்) கையகப்படுத்தியிருக்கிறது . இத்தகைய வெற்றிகரமான அனைத்து கையகப்படுத்துதல்களையும் ROCE மிகவும் குறையாமலும் கடன்-முதல் விகிதம் (debt equity ratio) மிகவும் கூடாமலும் மேற்கொண்டமை இங்கே கவனத்தில் கொள்ளத்தக்கது . கையகப்படுத்திய ஒவ்வொரு நிறுவனமும் ஏற்கெனவே கையகப்படுத்தப்பட்ட நிறுவனங்களைப் பூரணப்படுத்தும்  (compliment) விதமாக அமைந்திருப்பது இன்னும் சிறப்பு .

(iii) 2 - 1 = 2

மீண்டும் Motherson Sumi Systems நிறுவனத்தையே உதாரணமாகக் கொள்ளலாம் . 2022 ஆம் ஆண்டு நிறுவனம் அதன் Wiring Harness பகுதியைத் தனிப்பட்ட ஒரு நிறுவனமாகப் பிரித்து அதனைப் பங்குச்சந்தையில் பட்டியலிட்டது . ஒவ்வொரு தாய் நிறுவனப்பங்கிற்கும் சேய் நிறுவனப்பங்கு ஒன்று வழங்கப்பட்டது . முதல் பொது வெளியீட்டில் Motherson Sumi Systems நிறுவனத்தின் 100 பங்குகளை வாங்கிய முதலீட்டாளரிடம் தற்போது அதன் 57654 பங்குகள் (தற்போதைய அதன் பெயர் Samvardhana Motherson International Ltd) மற்றும் 57654 Motherson Sumi Wiring India பங்குகள் இருக்கும் . இவ்வாறு பிரிக்கப்பட்ட இரண்டு நிறுவனங்களும் அதனளவில் அதனதன் செல்வ உருவாக்கத்திற்கான பயணத்தைத் தொடர்ந்த வண்ணம் உள்ளன .

(iv) 2 - 1 = 0

Cox and Kings நிறுவனம் 2018 ஆம் ஆண்டு நிறுவனப்பிரிப்பு ஒன்றை மேற்கொண்டது . 10 ரூபாய் முக மதிப்பைக் கொண்ட Cox and Kings நிறுவனப்பங்கு ஒன்றுக்கு 5 ரூபாய் முக மதிப்பைக் கொண்ட

Cox and Kings Financial Services நிறுவனப்பங்குகள் மூன்று வழங்கப்பட்டன . தற்போது நிறுவனம் திவாலாகி விட்டது .

வருமானம் (Earnings) என்பது வேறு . பணப்பாய்ச்சல் (Cash flow) என்பது வேறு . Cox and Kings ஒரு பயண முகமை (Travel Agency) நிறுவனம் . பயணத்திற்கான வருமானம் அனைத்தும் பணமாக மாறும் என்று சொல்ல முடியாது . பயணங்கள் ரத்து செய்யப்படலாம் . முன் பணத்தோடு நிறுவனத்தின் வருமானம் நின்று விடலாம் . எந்த ஒரு நிறுவனத்தின் இலாப நஷ்டக் கணக்கையும் (profit and loss account) அதன் பணப்பாய்ச்சல் கணக்குடன் (cash flow statement) இணைத்துப் பார்க்கவேண்டும் .

Cox and Kings நிறுவனம் , Holiday break என்னும் நிறுவனத்தை விலைக்கு வாங்கியதில் அடுத்த பிரச்னை தொடங்கியது . நிறுவனத்தின் கடன்-பங்கு விகிதம் விண்ணை முட்டியது .

தொடர்புடைய நிறுவன பரிவர்த்தனைகள் (Related party transaction) ... பங்கு நீர்த்தல்

(Equity dilution) ... பணத்தைக் கையாடல் செய்தமை என்று பிரச்னைகள் நீண்டு கடைசியில் பங்குகளின் விலை அதன் உண்மை மதிப்பான பூஜ்யத்தை நெருங்கியது .