பரிச்சய சாய்வு

பரிச்சய சாய்வு

Familiarity Bias

நடத்தை நிதியியலின் (Behavioural Finance) பிறிதொரு அங்கமான பரிச்சய சாய்வு குறித்து இந்தப் பதிவில் பார்க்கலாம் .

பரிச்சயமானவைகளுக்கு அதிக முக்கியத்துவம் கொடுக்கும் தன்மை பரிச்சய சாய்வு என்பதாக அழைக்கப்படுகிறது .

நாம் நமது நண்பர்களின் வழக்கமான (regular) புகைப்படங்களையும் நமது வலம் இடமான (inverted) புகைப்படங்களையும் விரும்பிப் பார்க்கிறோமாம் . ஏனெனில் நிஜ வாழ்க்கையில் நமது நண்பர்களை வழக்கமான முறையில் பார்க்கிறோம் . ஆனால் கண்ணாடியில் நமது வலம் இடமான பிம்பத்தை மட்டுமே பார்த்துப் பழகியிருக்கிறோம் .

சரி , முதலீட்டில் இந்த சாய்வின் தாக்கம் என்னவாக இருக்கும் ? நிறுவனம் ஒன்றின் பொருளை நீங்கள் நீண்ட நெடுங்காலமாகப் பயன்படுத்துவதாகக் கொள்ளலாம் . எனில் அந்த நிறுவனத்தின் மேல் ஒரு சாய்வு ஏற்படுவது இயல்பே . ஆனால் சந்தையில் அந்த நிறுவனம் உயர் விலை வருவாய் விகிதத்தில் (price earning multiple) வர்த்தமாகிக் கொண்டிருக்கலாம் . நிறுவனம் என்பது வேறு . நிறுவனப் பங்கு என்பது வேறு . நிறுவனத்தின் நிதி விகிதங்கள் சிறப்பாக இருந்தாலும் உயர் விலை கொடுத்து அந்த நிறுவனப் பங்குகளை வாங்குதல் அறிவுடைமையாகாது . Infosys நிறுவனப் பங்குகளை 2000 ஆவது ஆண்டின் உயர் விலையில் வாங்கியவர்களுக்கு இலாபமோ அல்லது இழப்போ இல்லாத சூழ்நிலையை (break even) அடையப் பல்லாண்டுகள் பிடித்தது இங்கே நினைவில் கொள்ளத்தக்கது .

இன்னொன்று , நாம் வேலை பார்க்கும் நிறுவனத்தின் மேல் ஒரு இனம் புரியாத பாசம் ஏற்படுவது . இது ரொம்பவும் இயற்கையானது . ஆனால் இந்தப் பாசத்தின் காரணமாக அந்நிறுவனத்தில் முதலீட்டை மேற்கொண்டால் அதற்கு நாம் கொடுக்கும் விலை மிகவும் அதிகம் . ஏற்கெனவே நமது மனித மூலதனம் (Human capital) நிறுவனத்துடன் கட்டப்பட்டுள்ளது . நிறுவனப் பங்குகளை வாங்குவதன் மூலமாக நமது நிதி மூலதனத்தையும் (Financial capital) நிறுவனத்துடன் கட்டக்கூடாது . என்ரான் நிறுவனத்தின் கற்பனைக் கணக்கு விவகாரம் வெடித்த போது தங்கள் நிதி மூலதனத்தை என்ரான் நிறுவனத்தின் பங்குகளுடன் கட்டிய என்ரான் நிறுவன ஊழியர்கள் ஒரே இரவில் நடுத்தெருவிற்கு வந்து விட்டது யாராலும் மறக்க முடியாத ஒரு பாடம் .

இப்போது வர்த்தக சந்தை உலகளாவிய அளவில் வளர்ந்து விட்டது . கூகுள் தேடுபொறியில் தொடங்கி எத்தனை நிறுவனங்களின் சேவைகளை நாம் பயன்படுத்துகிறோம் ? பொங்கல் பொருட்களைக் கூட அமேசானில் தான் வாங்குகிறோம் . நெட் பிளிக்ஸில் படம் பார்க்கிறோம் . ஆனால்  முதலீடுகளை நம் நாட்டு நிறுவனங்களுடன் நிறுத்திக் கொள்வது பரிச்சய சாய்வின் பாற்பட்டது .

நேரடியாக அந்நிய நாட்டுப் பங்குகளில் முதலீடு செய்வதன் அபாயத்தை பரஸ்பர நிதி வழி முதலீடுகள் பெருமளவு குறைக்கின்றன . NASDAQ 100 Exchange Traded Fund மூலமாக NASDAQ பங்குச்சந்தையில் பட்டியலிடப்பட்டிருக்கும் முன்னணி 100 நிறுவனங்களில் முதலீட்டை மேற்கொள்ளலாம் . நீங்கள் முதலீடு செய்யும் ரூபாய் டாலராக மாற்றப்பட்டு NASDAQ 100 திட்டத்தில் முதலீடு செய்யப்படுகிறது . இந்த நிறுவனங்களின் வளர்ச்சியின் மூலமான வருமானம் ஒரு பக்கம் . கூடுதலாக , டாலருக்கு எதிராக ரூபாய் மதிப்பு குறைந்தால் அதன் மூலமாகவும்  வருமானம் கிடைக்கப்பெறும் . ஆனால் இந்த ETF க்கான வரி கடன் பத்திர நிதியை ஒத்தது . Parag Parikh Flexi Cap Fund இந்திய நிறுவனப் பங்குகளில் 65 சதவீதமும் அந்நிய நிறுவனப் பங்குகளில் 35 சதவீதமும் முதலீடு செய்யும் வண்ணம் வடிவமைக்கப்பட்டிருப்பதால் வரி இன்னும் குறைவு .

பரிச்சய சாய்வை நமக்குச் சாதகமாக எவ்விதம் பயன்படுத்தலாம் ? நீங்கள் மருத்துவராக இருக்கும் பட்சத்தில் உங்களுக்கு மருத்துவத்துறை சார்ந்த நிறுவனங்கள் குறித்த ஒரு புரிதல் கட்டாயம் இருக்கும் . அந்தப் புரிதலைக் கொண்டு உங்கள் முதலீட்டை மேற்கொள்ளலாம் . ஆனால் முன்னரே குறிப்பிட்ட மாதிரி அந்தப் புரிதல் ஒரு தொடக்கப்படி மட்டுமே . நீங்கள் முதலீட்டை மேற்கொள்ளும் முன்னர் நிறுவனத்தின் நிதி விகிதங்களை ஆராய வேண்டும் என்பது அடிப்படையானது .