பரஸ்பர நிதி மாயைகள்

பரஸ்பர நிதி மாயைகள்

1. புதிய நிதி வெளியீடுகள் மலிவானவை . பத்து ரூபாய் யூனிட் பத்து ரூபாய்க்கே கிடைக்கும் .

பத்து ரூபாய் யூனிட் பத்து ரூபாய்க்குக் கிடைப்பது எங்ஙனம் மலிவாகும் ? புதிய பரஸ்பர நிதி யூனிட்டுகள் பத்து ரூபாய் என்ற விலையில் வெளியிடப்படும் . இதில் மலிவு எங்கிருந்து வந்தது ? இது ஒரு மிகப்பெரிய மாயை . இந்த மாயையை பரஸ்பர நிதிகளை விற்கும் தரகு நிறுவனங்கள் ஊதிப் பெரிதாக்கும் வேலையைச் செவ்வனே செய்யும் . பத்து ரூபாய் பரஸ்பர நிதி யூனிட் ஐந்து ரூபாய்க்குக் கிடைத்தால் அது மலிவு என்று சொல்லலாம் . பத்து ரூபாய் யூனிட் எப்படி ஐந்து ரூபாய்க்குக் கிடைக்கும் என்கிறீர்களா ? ஒரு முறை பரஸ்பர நிதி ஒன்று பத்து ரூபாய் யூனிட்டை பத்து ரூபாய்க்கே வெளியிட்டது . மன்னிக்கவும் , பரஸ்பர நிதி விளம்பரங்களைப் படித்துப் படித்து இந்தப் பிரயோகம் மனதில் ஆழமாகப் பதிந்து விட்டது . பத்து ரூபாய்க்கு வெளியிடப்பட்ட பரஸ்பர நிதியின் NAV கரடியிடம் கடிபட்டு ஐந்து ரூபாய் ஆகிவிட்டது . இதனை மலிவு என்று சொல்லலாம் . இவ்வாறு ஐந்து ரூபாய் NAV வில் பரஸ்பர நிதிகளை வாங்கியவர்களுக்கு பங்காதாயம் இரண்டு மடங்கு கிடைக்கும் .

2. ஒரு பரஸ்பர நிதி யூனிட் ஆயிரம் ரூபாய் என்பது விலை அதிகமானது .

பரஸ்பர நிதி ஒன்று பல்லாண்டுகள் இலாபகரமாகச் செயல்பட்ட பின்னர் இந்த ஆயிரம் ரூபாய் என்ற தடை தாண்டும் ஓட்டத்தில் வெற்றி கொள்ளும் . இந்த ஆயிரம் ரூபாய் என்பது அதிகம் அல்லது குறைவு என்பதாக எதுவும் இல்லை . அன்றைய தேதியில் அந்த நிதி கொண்டிருக்கும் பங்குகளின் விலையைப் பங்குகளின் எண்ணிக்கையால் பெருக்கி வருவதான தொகை மட்டுமே இது . இன்னும் சொல்லப்போனால் இந்த மாதிரி ஆயிரம் பிறை கண்ட அனுபவ நிதிகளைத் தேர்ந்தெடுத்து முதலீடு செய்வது முதலீட்டாளர்களுக்கு ஒரு சாதகமான கட்டமைப்பைக் கொடுக்கவல்லது . பத்து ரூபாய் யூனிட் ஒரு வருடத்தில் பத்து சதவீதம் உயர்ந்தால் அதன் நிகர சொத்து மதிப்பு பதினோரு ரூபாய் ஆகும் . 1000 ரூபாய் யூனிட் பத்து சதவீதம் உயர்ந்தால் 1100 ரூபாய் ஆகும் . இரண்டும் ஒன்று தான் .

3. பரஸ்பர நிதி முதலீடுகளில் இதர செலவுகள் எதுவும் கிடையாது .

அனைத்துச் செலவுகளையும் சேர்த்த பரஸ்பர நிதி மேலாண்மைச் செலவுகள் அதிகபட்சமாக 2.5 சதவீதம் . நாம் பரஸ்பர நிதி NAV ஆகப் பார்ப்பது இந்த இரண்டரை சதவீதத்தைக் கழித்த தொகை மட்டுமே . பரஸ்பர நிதி நிறுவனம் ஒன்று , ஒரு நிதியில் 1000 கோடி ரூபாயை நிர்வகிப்பதாகக் கொள்ளலாம் . அந்த நிதி நன்கு செயல்பட்டு அதன் நிகர சொத்து மதிப்பு அதிகரிக்கிறது . புதிய முதலீடுகளும் அந்த நிதியைத் தேடி வருகிறது . ஒரு கட்டத்தில் 10000 கோடி நிதியை மேலாண்மை செய்யும் வண்ணம் அந்தப் பரஸ்பர நிதி வளர்ந்து விடுகிறது . 1000 கோடி ரூபாயை நிர்வகிக்க ஆகும் செலவுகளும் 10000 கோடி நிதியை நிர்வகிக்க ஆகும் செலவுகளும் ஒன்று தான் . ஆனால் பரஸ்பர நிதி நிறுவனங்கள் இந்த 10000 கோடியில் 2.5 சதவீதத்தை மேலாண்மைச் செலவுகள் என்ற கணக்கில் எடுத்துக் கொள்ளும் . பரஸ்பர நிதி மேலாண்மை நிறுவனங்களின் நிகர இலாப வரம்பு (Net Profit Margin) அதிகமாக இருப்பதன் காரணம் இது தான் . ஆக , பரஸ்பர நிதிகளில் பயனாளர் என்ற முறையில் முதலீடு செய்வதை விட அதன் நிர்வாகி என்ற அடிப்படையில் அத்தகைய பங்குகளை வாங்குவது இன்னும் சிறந்த ஒரு முதலீட்டு முறையாகும் .

4. பங்கு சார்ந்த பரஸ்பர நிதிகள் மட்டுமே ஏறி இறங்கும் தன்மை படைத்தது . கடன் சார்ந்த நிதிகள் ஏறி இறங்காது .

கடன் சார்ந்த நிதிகளும் ஏறியிறங்கும் . கடன் பத்திரங்களின் மதிப்பு அவை வழங்கும் வட்டி விகிதத்துடன் தலைகீழ் விகிதத்தில் இணைந்துள்ளது . வட்டி விகிதம் குறைந்தால் கடன் பத்திரங்களின் மதிப்பு கூடும் . வட்டி விகிதம் கூடினால் கடன் பத்திரங்களின் மதிப்பு குறையும் . தவறான , பத்திரமில்லாத பத்திர முதலீடுகள் மூலமாக முதலுக்கே மோசம் நேரலாம் .

5. பரஸ்பர நிதி முதலீட்டு வருமானமும் பரஸ்பர நிதி முதலீட்டாளர்கள் வருமானமும் ஒன்று தான் .

ஒன்றல்ல . ஒரு பரஸ்பர நிதி பத்தாண்டுகளின் முடிவில் இருபது சதவீத CAGR  கொடுத்திருக்கிறதென்றால் அந்தக் குறிப்பிட்ட கால அளவில் அந்த நிதியை வைத்திருப்பவர்களுக்கு மட்டுமே அந்த வருமானம் கிடைக்கப்பெறும் . அதுவும் growth option ல் உள்ளவர்களுக்கு மட்டுமே . Dividend option ல் உள்ளவர்களுக்கு அவர்கள் அந்த dividend ஐ என்ன செய்கிறார்கள் என்பதைப் பொறுத்து வருமானம் மாறி விடும் . முதலீட்டாளர்கள் வருடாவருடம் முதல் தர நிதிகளைத் துரத்தித் துரத்தி முதலீடு செய்வது , கரடிக்குப் பயந்து நிதிகளை விற்று வைப்பது இன்ன பிற செயல்களில் ஈடுபடுவதால் முதலீட்டாளர் வருமானம் முதலீட்டு வருமானத்தை விட சராசரியாக ஏழு சதவீதம் குறைவதாக ஒரு கணக்கு இருக்கிறது . அமெரிக்க டவ் ஜோன்ஸ் குறியீடு நீண்ட கால அளவில் பத்து சதவீத முதலீட்டு வருமானம் கொடுத்திருப்பதாகக் கொண்டால் முதலீட்டாளர்களுக்கான வருமானம் வெறும் மூன்று சதவீதம் மட்டுமே .

6. பரஸ்பர நிதி மேலாண்மைச் செலவுகள் முதலீட்டாளர்கள் வருமானத்தில் முக்கியப் பங்கை வகிக்கவில்லை .

ஒரு பரஸ்பர நிதியின் மேலாண்மைச் செலவு 2.4 சதவீதம் என்று கொள்ளலாம் . இன்னொரு நிதியின் மேலாண்மைச் செலவு 1 சதவீதம் என்றும் கொள்ளலாம் . இரண்டு நிதிகளுக்கும் இடையிலான வித்தியாசம் வெறும் 1.4 சதவீதம் மட்டுமே . இரண்டு நிதிகளும் மேலாண்மைச் செலவுகளுக்கு முந்தையதாக ஒரே மாதிரியான வருமானத்தைக் கொடுக்கின்றன . பத்து வருட முடிவில் குறைவான மேலாண்மைச் செலவைக் கொண்ட நிதி பத்து சதவீதம் கூடுதலான வருமானத்தைக் கொடுக்கும் . முப்பது வருடங்களின் முடிவில் ஐம்பது சதவீதத்திற்கும் மேலான வருமானம் கிடைக்கும் . முப்பது வருட முடிவில் சந்தையின் போக்கைத் தீர்மானிப்பதில் நம் பங்கு எதுவும் இல்லை . ஆனால் மேலாண்மைச் செலவுகளைக் குறைப்பது நம் கையில் உள்ளது .

7. அவ்வப்போது சிறப்பாகச் செயல்படும் பரஸ்பர நிதிகளில் முதலீட்டைக் கை மாற்றி விடுவது நலம் தரும் .

ஒவ்வொரு வருடமும் வணிக இதழ்கள் கடந்த ஆண்டு சிறப்பாகச் செயல்பட்ட பரஸ்பர நிதிகளின் பட்டியல் ஒன்றை வெளியிடும் . இதனைப் படிப்பதற்கான ஒரு சுவாரஸ்யம் என்ற அளவில்  மட்டுமே அணுக வேண்டும் . இந்த மாதிரி சிறப்பாகச் செயல்படும் பரஸ்பர நிதிகள் வருடாவருடம் மாறிக் கொண்டே இருக்கும் . மிகவும் முக்கியமாகக் கடந்த வருடம் சிறப்பாகச் செயல்பட்ட ஒரு நிதி அடுத்த ஆண்டு கடைநிலையை அடையக்கூடிய வாய்ப்பும் உண்டு . இவ்வாறு தொடர்ந்து நிதிகளைக் கை மாற்றி விடுவது உங்கள் பங்குத் தொகுப்பின் குறைச் செயலாக்கத்திற்கு வழி வகுப்பதாக அமைந்து விடும் . மேலும் உங்கள் பங்குத் தொகுப்பின் ஒத்திசைவையும் அது பதம் பார்த்து விடும் .

8. துறை சார் நிதி (Sector Fund) முதலீடுகள் அதிக வருமானங்களைக் கொடுக்கவல்லவை .

பொதுவாகத் துறை சார் நிதிகள் , பன்மய நிதிகளை (Diversified Funds) விட அதிக அபாயங்களுக்கு உட்பட்டவை . ஒரு துறையின் அடியையும் முடியையும் கணிப்பது சிக்கலான ஒரு விஷயம் . பரஸ்பர நிதி நிறுவனங்கள் இதனை மேலும் சிக்கலான ஒன்றாக மாற்றுகின்றன . ஒரு துறை அதன் உச்சத்தில் இருக்கும் போது தான் பரஸ்பர நிதி நிறுவனங்கள் அந்தத் துறை சார்ந்த நிதிகளை வெளியிடும் . அவர்களைச் சொல்லியும் குற்றமில்லை . ஒரு துறையின் வளர்ச்சி வாய்ப்புகள் அச்சத்தில் இருக்கும் போது அது சார்ந்த நிதிகளை வெளியிட்டால் யார் அதனை வாங்குவார்கள் ? உச்சத்தில் இருக்கும் துறை சார் நிதிகளை வாங்குவது buy high ன் பாற்பட்டது . இன்னும் சொல்லப்போனால் பரஸ்பர நிதி நிறுவனங்கள் ஒரு துறை சார்ந்த நிதிகளை வெளியிடத் தொடங்கினால் அந்தத் துறை தனது உச்சபட்ச அளவை நெருங்கி விட்டதாக அர்த்தம் . அந்தத் துறையை விட்டு விலகி விடுதல் தான் ஒரு தேர்ந்த முடிவாக இருக்க முடியும் .

9. பரஸ்பர நிதி முதலீடுகளில் முதலீட்டை மேற்கொள்ள நிறையப் பணம் தேவை .

தேவையில்லை . இன்னும் சொல்லப்போனால் உங்களிடம் நிறையப் பணம் இருந்தாலும் அது மீமிகைக் கரடிச் சந்தையாக இருந்தாலன்றி அவ்வளவு பணத்தையும் மொத்தமாக முதலீடு செய்வது அறிவுடைமையாகாது . Rupee cost averaging என்ற அடிப்படையில் சிறிது சிறிதாக முதலீடு செய்வது ஒரு கேந்திரமான முதலீட்டு உத்தியாகும் . இந்தக் காலப் பன்மயமாக்கம் (Time Diversification) முறையின் மூலமாக சந்தையின் ஏற்ற இறக்கங்களை நமக்குச் சாதகமாக மாற்றிக் கொள்ளலாம் . சந்தை அதிகரிப்பில் குறைந்த பரஸ்பர நிதி யூனிட்களையும் சந்தைக் குறைப்பில் அதிக பரஸ்பர நிதி யூனிட்களையும் வாங்கிச் சேர்க்கலாம் .

10.நட்சத்திரக் குறியீடு பெற்ற பரஸ்பர நிதிகள் சிறப்பாகச் செயல்படும் .

நட்சத்திரக் குறியீடு நிதிகளின் நடந்து முடிந்த காலத்திற்கானது . நிதியின் எதிர் வரும் செயல்பாட்டைக் குறித்து அது எதனையும் தெரிவிக்காது . இன்றைய நட்சத்திரக் குறி நாளைய கேள்விக்குறி ஆனாலும் அதில் ஆச்சரியம் எதுவுமில்லை . ஐந்து நட்சத்திரக் குறியீடு இரண்டு நட்சத்திரமாகும் . இரண்டு மூன்றாகும் . நீண்ட கால அளவில் நிதி எவ்வாறு செயல்படுகிறது என்பதை மட்டுமே நாம் பார்க்க வேண்டும் . இந்தக் கால அளவை பத்தாண்டுகளின் கணக்கில் கொள்ள வேண்டும் . இந்த பத்தாண்டுகளின் சராசரியில் ஒரு நிதி எவ்வளவு வருமானம் கொடுத்திருக்கிறது என்பது மட்டுமே முக்கியம் . நட்சத்திரக் குறியீடுகளைக் குறை சொல்ல வரவில்லை . ஒரு பரஸ்பர நிதி ஐந்து நட்சத்திரக் குறியீட்டைத் தொடர்ந்து தக்க வைத்துக் கொள்ள இயலாது என்று சொல்ல வருகிறேன் . ஒன்றிரண்டு நட்சத்திரங்களைத் தவற விட்டதற்காக நிதிகளைத் தவற விட்டு விடாதீர்கள் . கண் சிமிட்டும் நட்சத்திரங்களை ரொம்பவும் கணக்கில் கொள்ள வேண்டாம் .