எளிமையே வெல்லும் - 1

எளிமையே வெல்லும் - 1

அந்தக் காலத்தில் பாடப் புத்தகங்களுக்கு அட்டை போடுவது கடினமான ஒரு செயலாக இருக்கும் . அதுவும் ஜுன் மாதம் வந்து விட்டால் போதும் , ஒரு ஆள் உயர பாடப் புத்தகங்களுக்கு அட்டை போட வேண்டியிருக்கும் . இப்போது ஆயத்த அட்டைகள் (Readymade Cover) வந்து விட்டன. இந்த வரியை எழுதுவதற்குள் அட்டை போட்டு விடலாம். அதுவும் புத்தகத்தை அளந்து அட்டையைத் தேர்ந்தெடுப்பது இப்போது ரொம்பவும் எளிமையாகி விட்டது. ஒரு புத்தகத்திற்கு நீளம், அகலம் மற்றும் உயரம் என்பதான மூன்று அளவுருக்கள் (Parameters) இருக்கின்றன. ஆயத்த அட்டைகள், உயரம் என்ற ஒரேயொரு அளவை மட்டுமே கணக்கில் எடுத்துக் கொள்ளும். நீளம் மற்றும் அகலம் என்ற இரண்டு அளவுருக்களையும் இணைத்து ஒரு அளவுருவாக்கிக் கொள்ளும். அந்த நீளம் மற்றும் அகலம் இணைக்கப்பட்ட அளவுருவை பெரிய அளவுகளில் வைத்துக் கொண்டால் பிரச்னை தீர்ந்தது. புத்தகத்தின் உயரத்தை மட்டும் அளந்து அட்டையைத் தேர்ந்தெடுத்து விடலாம். நீளம் மற்றும் அகலம் பெரிதாக இருப்பதால் எந்தப் புத்தகத்திற்கும் அது பொருந்தும் வண்ணம் இருக்கும். நீளம் மற்றும் அகலம் சிறியதாக இருந்தாலும் மடக்கி ஒட்டிக் கொள்ளலாம். நீளம் மற்றும் அகலம் பெரிதாக இருந்தாலும் அதற்குத் தகுந்தாற்போல் கொஞ்சமாக மடக்கிக் கொள்ளும் வண்ணம் இந்த ஆயத்த அட்டைகள் வடிவமைக்கப்பட்டிருக்கின்றன. புத்தகத்தின் உயரம் என்ற ஒரேயொரு அளவுருவை மட்டும் கணக்கில் கொள்வதால் பதினைந்து சென்டி மீட்டரில் ஆரம்பித்து பதினாறு, பதினேழு... என்பதாக ஒரு பத்து உயரங்களில் மட்டும் அட்டைகளை வைத்துக் கொண்டால் போதும். இந்த உயரம் என்ற ஒரேயொரு அளவுருவை மட்டும் கணக்கில் கொள்ளாமல் நீளம், அகலம் மற்றும் உயரம் என்ற மூன்று அளவுருக்களையும் கணக்கில் கொண்டால் 1000 வெவ்வேறு விதமான அட்டைகளை வைத்துக் கொள்ள வேண்டி வரும்.

பங்குச்சந்தை ஒரு சிக்கலான தகவமைப்பு அமைப்பு (Complex Adaptive System) சாதாரண ஒரு ஆயத்த அட்டையின் மூன்று அளவுருக்கள் 1000 விதங்களாகப் பரிணமிக்கும் போது பங்குச்சந்தை போன்ற ஒரு சிக்கலான தகவமைப்பின் பரிணமிப்பைச் சற்றே யோசித்துப் பாருங்கள். 

பங்குச்சந்தையில் பொதுவாக மேலிருந்து கீழ் (top down) மற்றும் கீழிருந்து மேல் (bottom up) என்பதான இருவேறு வழிமுறைகளில் முதலீடுகள் மேற்கொள்ளப்படுகின்றன. மேலிருந்து கீழாக ஒரு நாட்டின் GDP, பணவீக்கம், கச்சா எண்ணெயின் விலை, நிதி பற்றாக்குறை, FII முதலீடு, அந்நியச் செலாவணி இருப்பு, டாலருக்கு நிகரான சொந்த நாணய மதிப்பு, வேலையின்மை விகிதம், பருவநிலை மற்றும் கடன் வட்டி விகிதம் முதலான குறிப்பான்கள் (indicators) கணக்கில் கொள்ளப்படுகின்றன. கீழிருந்து மேலாக வாகனத்திற்கான தேவைப்பாடு, நுகர்வோர் செலவினங்கள், சிமெண்ட் தேவைப்பாடு, மின்சார உபயோகம்... போன்றவை கணக்கில் கொள்ளப்படுகின்றன. 

இது போக நிறுவன அடிப்படைப் பகுப்பாய்வு (Fundamental Analysis) மற்றும் தொழில்நுட்பப் பகுப்பாய்வு (Technical Analysis)....

இது போக சில நகைச்சுவையான குறிப்பான்களான (indicator) super bowl (National football conference குழு வென்றால் காளைச்சந்தை/  American football conference குழு வென்றால் கரடிச்சந்தை) January Effect ( வருடத்தின் முடிவில் வரியை சமன் செய்யும் பொருட்டு முதலீட்டாளர்கள் பங்குகளை விற்பதால் டிசம்பர் மாதம் பங்குச்சந்தை குறியீடுகள் குறையும்/ ஜனவரி மாதம் முதலீட்டாளர்கள் பங்குகளை வாங்கத் தொடங்குவதால் உயரும்) என்பதான ஒரு வரிசையே இருக்கிறது. Hemline என்று ஒரு குறிப்பான் இருக்கிறது . தமிழில் குட்டைப் பாவாடை என்று சொல்லலாம். பெண்கள் அணியும் பாவாடையின் உயரம் குறையக் குறைய பங்குச்சந்தை உயரும் என்பதாக ஒரு ஐதீகம். இந்தக் குறிப்பானை மட்டும் விசுவாசமாகத் தொடரும் ஒரு சிலரும் இருக்கத்தான் செய்கிறார்கள். ஆளுக்கொரு ஆசை... ஆளுக்கொரு பாதை... 

இதையெல்லாம் அலசி ஆராய்ந்து முதலீடு செய்த பின்பு பங்குச்சந்தையில் எதிர்பாராத சில அணுகுண்டுகள் விழும். உலக வர்த்தக மைய அணுகுண்டு, வீட்டுக்கடன் குண்டு... என்று சொல்லிக்கொண்டே போகலாம். இப்போது கிருமித்தொற்று என்ற குண்டு புகைந்து கொண்டிருக்கிறது. எந்நேரமும் வெடிக்கலாம். ஆங்கிலத்தில் chaos என்று சொல்வார்கள். தமிழில் பெருங்குழப்பம் என்று சொல்லலாம். இந்தப் பெருங் குழப்பத்தில் நாம் எவ்விதம் பங்குச்சந்தை முதலீட்டை மேற்கொள்ள முடியும்?

ஒரு எளிமையான சூத்திரம் இருக்கிறது. வளர்ந்து வரும் பங்காதாயத்தைக் கொடுக்கக்கூடிய பங்குகளை, மதிப்பு முதலீடு அடிப்படையில் வாங்கி, காலா காலத்திற்கும் வைத்திருப்பது. வளர்ந்து வரும் பங்காதாயங்களைக் கொடுக்கக்கூடிய பங்குகளின் விலை கூடியே தீரும். அப்படியே வருடாவருடம் கூடாவிட்டாலும் நீண்ட கால அளவில் பங்கின் விலைகள் அவை தரும் பங்காதாயங்களை அடியொற்றிச் செல்வதாக மட்டுமே இருக்கும் . இதற்கிடையில் நாம் வருடாவருடம்  வளர்ந்து வரும் பங்காதாயங்களைப் பெறலாம். இவ்விதமாக நம் வருமானத்திற்கு நாம் பங்குச்சந்தையைச் சார்ந்திருக்க வேண்டிய அவசியமில்லாமல் போகிறது. வெயிலோ மழையோ, காளைச்சந்தையோ கரடிச்சந்தையோ நமக்கு வருமானம் கிடைத்து விடும். ஆக , பங்குச்சந்தை முதலீட்டுக்கான சூத்திரம் மிகவும் எளியது  'உயர்ந்து வரும் பங்காதாயம் - உயர்ந்து வரும் பங்கு ஈட்டு விகிதம் - உயர்ந்து வரும் பங்கு விலைகள்'  அவ்வளவே .

பங்குச்சந்தையில் மட்டுமல்ல, வாழ்க்கையிலும் எளிமையான உத்திகளே வெல்லும். பங்குச்சந்தை முதலீட்டை, உயரம் தாண்டும் ஒரு ஓட்டமாகக் கொண்டால், நான் ஒரேயொரு அடி உயரம் தாண்டுதலில் மட்டும் பங்கு கொள்வேன் என்பது வாரன் பஃபெட்டின் வாக்கு. பூரணத்துவம் என்பது புதிதாக எதையும் சேர்ப்பதில் இல்லை. இனிமேல் அதிலிருந்து எதையும் எடுக்க முடியாது என்பதில் அது அடங்கியிருக்கிறது என்று Antoine de exupery ஏற்கனவே கூறியிருக்கிறார்.