தெரிந்த பங்கு மொழி தெரியாத விளக்கம்

தெரிந்த பங்கு மொழி தெரியாத விளக்கம்

குறைந்த விலைக்கு வாங்குக / அதிக விலைக்கு விற்க (buy low/ sell high) என்பது பங்குச்சந்தை பால பாடம். William Thorndike ன் The Outsiders புத்தகத்தைப் படிக்கும் வரை buy low, sell high என்றால் பங்குகளைக் குறைந்த விலைக்கு வாங்கி அதிக விலைக்கு விற்பது என்பதாகத் தான் நினைத்திருந்தேன்.  The Outsiders புத்தகத்தில் William Thorndike, Teledyne நிறுவனம் குறித்த ஒரு அத்தியாயத்தில், பங்குகளைக் குறைந்த விலைக்கு வாங்குதல் மற்றும் அதிக விலைக்கு விற்றல் என்ற கருத்தாக்கத்தை ஒரு புதிய கோணத்தில் விளக்குகிறார்.

Teledyne நிறுவனர் Singleton வாரன் பஃபெட்டால் capital allocation guru என்று பாராட்டப்பட்டவர்.  Singleton , கரடிச்சந்தையில்  Teledyne நிறுவனத்தின், விலை வருவாய் விகிதம் (PE Multiple) குறைந்த அளவீட்டில் வர்த்தகமாகும் போது தனது நிறுவனப் பங்குகளைத் தானே வாங்கிக்கொண்டது குறைந்த விலைக்கு வாங்குதல் (buy low) காளைச்சந்தையில் Teledyne நிறுவனத்தின், விலை வருவாய் விகிதம் அதிகமான அளவீட்டில் வர்த்தகமாகும் போது, அந்த அதிக மதிப்புடைய பங்கைக் கொண்டு பிற நிறுவனங்களைக் கையகப்படுத்தியது அதிக விலைக்கு விற்றல் (sell high) குறைந்த PE என்பது மாறக்கூடிய, தற்காலிகமான ஒரு மதிப்பு. பங்குகளைத் திரும்ப வாங்குவதன் மூலமாக அந்த மாறக்கூடிய மற்றும் தற்காலிகமான குறை மதிப்பைக் கொண்டு தனது நிறுவனத்தின் உள்ளார்ந்த மதிப்பைக் (intrinsic value) கூட்டிக்கொண்டதில் Singleton ன் மேதைமை வெளிப்படுகிறது. அதிகமான PE என்பதும் கற்பூரம் மாதிரி காற்றில் கரையக்கூடியது. பிற நிறுவனங்களைக் கையகப்படுத்தியதின் மூலமாக அந்த மாறக்கூடிய மற்றும் தற்காலிகமான உயர் மதிப்பை மாறாத உள்ளார்ந்த மதிப்பாக மாற்றிக்கொண்டது Singleton ன் திறமைக்கு மற்றொரு உதாரணம். 

தரமான நிறுவனங்களாகப் பார்த்துப் பார்த்து வாங்கி விட்டால் நாம் தனிப்பட்ட முறையில் buy low, sell high என்று பங்குகளை வாங்கவோ விற்கவோ செய்ய வேண்டிய அவசியமில்லை. Side car investing என்று சொல்வார்கள். அந்த நிறுவனர், நம் சார்பாக, நிறுவனத்திற்கு எந்தெந்த சமயங்களில் என்னென்ன தேவையோ அதனை மேற்கொள்வார். நிறுவனப்பங்கை வாங்குவதுடன் நம் வேலை முடிந்தது.

இந்தியப் பங்குச்சந்தையில் பட்டியலிடப்பட்டிருக்கும் side car investment நிறுவனங்களின் சிகர உதாரணமான Piramal Enterprises குறித்து திரு. Sanjay Bakshi கூறுவதைக் கொஞ்சம் பார்க்கலாம். 

பிரமல் முதலில் ஜவுளி நிறுவனமாகத் தான் இருந்தது. நிறுவனர் அஜய் பிரமல், ஜவுளித்துறையின் எதிர்காலம் சிக்கலாக இருக்கும் என்று கணித்து, 1988 ல், அப்போதைய அரசாங்கத்தின் கொள்கை முடிவுகளின் காரணமாக இந்தியாவை விட்டு வெளியேறிய மருந்துத்துறை (Pharma) நிறுவனமான Nicholas lab ஐ  இடர்ப்பாடு விற்பனை (distress selling) என்ற அடிப்படையில் மலிவான மதிப்பில் (buy low) வாங்கினார். அது அஜய் பிரமல் போட்ட கோலத்தின் முதல் புள்ளி.

தொடர்ந்து Roche Products (1993) Boehringer Mannhiens (1996) Hoechest Research Centre (1998) Roune Poulenc (2000) ICI Pharma (2002) முதலான நிறுவனங்களை buy low என்ற கருத்தாக்கத்தில் வாங்குகிறார். இந்த நிறுவனங்கள் அனைத்தையும் அவற்றின் வருவாயைப் போல் அதிக பட்சமாக 3 மடங்கு என்ற மதிப்பீட்டில் வாங்கியது குறிப்பிடத்தக்கது. இவ்விதமாக ஒரு அழகிய கோலம் உருவாகிறது. 

காலம் உருண்டோடுகிறது. 2010 ல் உலக மருந்துத்துறை நிறுவனங்கள், இந்திய மருந்துத்துறை நிறுவனங்களை வாங்க வரிசை கட்டி நிற்கையில் Abbott Laboratories க்கு அவரது நிறுவன formulation business ஐ மட்டும் 17140 கோடி ரூபாய்க்கு (sell high) விற்கிறார். இந்த விற்பனை, நிறுவனத்தின் வருவாயைப் போல் 9 மடங்கு என்பதும் இங்கே குறிப்பிடத்தக்கது.  

அஜய் பிரமலிடம் அந்நிய நிறுவனங்கள் தங்கள் நிறுவனங்களை விற்பதற்கும் மற்றும் அவரது நிறுவனத்தை வாங்குவதற்குமான அடிப்படையான காரணமாக இருப்பது பிரமலின் மேல் அவர்கள் கொண்ட நம்பிக்கை. வீடு தரையின் மேல் நிற்கவில்லை. ஒரு பெண்ணின் மேல் நிற்கிறது என்பதாக ஒரு பழமொழி உண்டு. அது மாதிரி பங்குச்சந்தை நம்பிக்கையின் (trust) மேல் நிற்கிறது. 

1988 ல் பிரமல் நிறுவனத்தின் சந்தை மதிப்பு (market capitalisation) வெறும் 6 கோடி ரூபாய் மட்டுமே. 2021 ல் அதன் சந்தை மதிப்பு 58060 கோடி. இந்த இடைப்பட்ட 33 ஆண்டுகளில் அதன் சந்தை மதிப்பு 32 சதவீத CAGR என்ற அளவில் வளர்ச்சியடைந்திருக்கிறது. மும்பை பங்குச்சந்தைக் குறியீட்டின் சராசரி வருமானம் வெறும் 15 சதவீத CAGR மட்டுமே . 100 ரூபாயை sensex ல் முதலீடு செய்திருந்தால் ரூபாய் 10000 மட்டுமே கிடைத்திருக்கும். அதே 100 ரூபாய் பிரமலின் நிறுவனத்தில் 9.5 இலட்சம் ரூபாயாக வளர்ந்திருக்கிறது. 

பிரமல் இப்போது ஒரு குறுக்குச் சாலையில்  நிற்கிறார். Now Piramal is in cross road. Abbott க்கு விற்றது போக எஞ்சிய CRAMS, Critical Care, OTC முதலான மருந்துத்துறை தொகுப்புடன் நிதித்துறை, ரியல் எஸ்டேட் முதலான துறைகளில் கால் பதிக்கத் தொடங்கியிருக்கிறார். நிறுவனத்தைச் சுற்றி ஒரே பனிமூட்டமாக இருக்கிறது. பனிமூட்டம் தான் பங்குகளை வாங்குவதற்கான உகந்த ஒரு தருணம். மேலும் அபாய வெகுமதி விகிதம் (risk- reward ratio) அஜய் பிரமலுக்குச் சாதகமாக இருக்கிறது. பிரமல் மீண்டும் சாதிப்பாரா? காலம் தான் பதில் சொல்ல வேண்டும்.

குறிப்புதவிய இணையதளம் fundooprofessor.wordpress.com