HDFC - ஒரு நினைவுக் குறிப்பு

HDFC - ஒரு நினைவுக் குறிப்பு

HDFC நிறுவனம் இனி தனிப்பட்ட முறையில் செயல்படப் போவதில்லை . அது அதன் துணை நிறுவனமான HDFC வங்கியுடன் இணைக்கப்பட உள்ளது . இந்த இணைப்பின் பின்னர் சந்தை மதிப்பு (Market Capitalization) அடிப்படையில் அது உலகின் நான்காவது பெரிய வங்கியாக மாறும் . அதன் உத்தேச சந்தை மதிப்பு 157 பில்லியன் டாலர்கள் . இந்திய நாணய மதிப்பில் 13 இலட்சம் கோடி ரூபாய் .

இந்த இணைப்புக்கு இரண்டு முக்கியமான காரணங்கள் இருக்கின்றன . முதலாவது HDFC நிறுவனத்தின் பார்வையிலானது . வீட்டுக் கடனுக்கான வட்டி விகிதம் குறைந்து கொண்டே வரும் இன்றைய சூழலில் வீட்டுக்கடன் வழங்குவதற்கான நிதியை குறைந்த வட்டி விகிதங்களில் நிறுவனத்தால் திரட்ட முடிவது மேலும் மேலும் கடினமாகிக் கொண்டே வருகிறது . வங்கியாக இருக்கும் பட்சத்தில் சேமிப்புக் கணக்கு மற்றும் நடப்புக் கணக்குகள் மூலமாக குறைந்த வட்டி விகிதங்களில் நிதியைத் திரட்டிக் கொள்ளலாம் . இன்னொரு காரணம் HDFC வங்கியின் பார்வையிலானது . HDFC வங்கி , வீட்டுக்கடன் வழங்க முடியாத நிலையில் இருந்தது . ஏனென்றால் அதன் தாய் நிறுவனம் வீட்டுக்கடன் வழங்கும் நிறுவனமாக இருந்தது . இந்த இணைப்புக்குப் பின்னர் HDFC வங்கி , வீட்டுக்கடன் வழங்கத் தடையேதும் இல்லை .

எவ்வளவுக்கு எவ்வளவு பின்னால் பார்க்கிறோமோ அவ்வளவுக்கு அவ்வளவு முன்னால் பார்க்கலாம் . அந்த வகையில் HDFC நிறுவனத்தை அதன் IPO வில் இருந்து பார்க்கலாம் .

HDFC நிறுவனம் 1970 ஆம் ஆண்டு H T Parekh ஆல் தொடங்கப்பட்டது . 1977 ல் முதல் பொது வெளியீடு அதன் முக மதிப்பான 100 ரூபாய் என்ற விலையில் வெளி வந்தது . காலப்போக்கில் அதன் பங்குகள் 10 ரூபாய் என்றும் பின்னர் 2 ரூபாயாகவும் பிரிக்கப்பட்டன . ஒருமுறை , ஒன்றுக்கு ஒன்று என்ற விகிதத்தில் இலவசப்பங்குகள் வழங்கப்பட்டன . ஆக அதன் ஒரு பங்கு 100 பங்குகளாக மலர்ந்து மணம் பெற்றுள்ளது . ஒரு பங்கின் இன்றைய விலை 2821 ரூபாய் . அதாவது HDFC பங்கு 2821 மடங்காளர் .

இது ஒரு பிரமாண்ட வருமானம் போன்று தோற்றமளிப்பது வெறும் தோற்றம் மட்டுமே . 1977 லிருந்து CAGR போட்டுப் பார்த்தால் கிட்டத்தட்ட 18.87 சதவீதம் வருகிறது .

அதற்காக இந்த 19 சதவீதத்தைக் குறைவாக எண்ணி விட வேண்டாம் . 46 வருடங்களாக 19 சதவீதக் கூட்டுப் பெருக்கத்தைக் கொடுப்பது ஒப்புயர்வற்ற ஒரு சாதனையாகும் . வாரன் பஃபெட்டின் முதலீட்டு நிறுவனம் இதே அளவு வருமானத்தை மட்டுமே கொடுத்திருக்கிறது என்பது நினைவில் கொள்ள வேண்டிய ஒன்று .

இந்தக் கணக்கீட்டில் நிறுவனம் வருடாவருடம் வழங்கிய பங்காதாயம் சேர்க்கப்படவில்லை . பங்காதாயப் பலன்களைக் குறைவாக மதிப்பிட்டு விடாதீர்கள் . நிறுவனத்தின் கடந்த மூன்று ஆண்டு பங்காதாயம் முறையே 1150 , 1500  மற்றும் 2200 சதவீதம் .‌ 100 பங்குகளுக்கு 2300 , 3000 மற்றும் 4400 ரூபாய் கிடைக்கப் பெற்றிருக்கிறது . ஆரம்ப முதலீடான 100 ரூபாயைக் கொண்டு கணக்கிட்டால் இவை 23 மடங்கு , 30 மடங்கு மற்றும் 44 மடங்கு வருமானங்களைத் தந்திருக்கிறது . இத்தகைய பங்காதாயங்களை ஆரம்பத்திலிருந்து அதன் பங்குகளில் மறு முதலீடு செய்திருந்தால் இன்னும் பன்மடங்கு இலாபம் கிடைத்திருக்கும் .

பங்குகளிலிருந்து கிடைக்கப்பெறும் வருமானம் நீங்கள் அதனை விற்கும் போது தீர்மானிக்கப்படுவதில்லை . மாறாக அதனை எவ்வளவு குறைவிலையில் வாங்குகிறீர்கள் என்னும் புள்ளியில் தீர்மானிக்கப்படுகிறது . அந்த வகையில் HDFC நிறுவனப்பங்கு அதன் முதல் பொது வெளியீட்டின் பின்னர் ஒரு கட்டத்தில் 73 ரூபாயில் வர்த்தகமானது . அந்த விலையில் வாங்கியவர்களுக்கு 19.68 CAGR வருகிறது . 100 ரூபாயில் வாங்கியவர்களுக்கும் 73 ரூபாயில் வாங்கியவர்களுக்கும் கூட்டுப் பெருக்க  வித்தியாசம் வெறும் 0.81 சதவீதம் என்று குறைவாக மதிப்பிட்டு விட வேண்டாம் . வெறும் அரை சத வருமான வேறுபாடுகள் கூட 46 ஆண்டு காலத்தில் ஆகப்பெரிய வித்தியாசங்களை ஏற்படுத்தி விடும் . 100 ரூபாய் கொடுத்து வாங்கியவர்களுக்கு HDFC பங்கு 2821 மடங்காளர் என்று பார்த்தோம் . 73 ரூபாய் கொடுத்து வாங்கியவர்களுக்கு அது 3864 மடங்காளர் . வெறும் 27 ரூபாய் விலை வேறுபாடு 46 ஆண்டுகளில் கூடுதலாக ஒரு 1043 மடங்காளரை உருவாக்கியிருக்கிறது .

HDFC வெறும் வீட்டுக்கடன் வழங்கும் நிறுவனம் மட்டுமல்ல . அது HDFC AMC (53 % சதவீத பங்குகள்) , HDFC Capital (89) HDFC Credila (10) , HDB Financial Services (95) , HDFC Life Insurance (50.5) , HDFC ERGO (50.5) , HDFC Sales (100)  HDFC Securities (100) என்று பல்வேறு துணை நிறுவனங்களை வெற்றிகரமாக நடத்தி வருகிறது . அதில் சில நிறுவனங்கள் சந்தையில் பட்டியலிடப்பட்டுள்ளன . அவற்றில் ஒன்றான HDFC வங்கியுடன் பின் இணைப்பு (Reverse Merger) என்ற வகையில் தன் துணை நிறுவனங்களுடன் இப்போது HDFC இணையவிருக்கிறது . HDFC நிறுவனப் பங்குகள் 25 க்கு HDFC வங்கிப் பங்குகள் 42 வழங்கப்படவுள்ளன .

Adjacent possible என்பதாக ஒரு கருத்தாக்கம் இருக்கிறது . தமிழில் 'ஒத்திசைவு வாய்ப்புகள் ' என்பதாக மொழி பெயர்க்கலாம் . வீட்டுக்கடன் வழங்கும் நிறுவனம் பிற கடன்களை வழங்கும் நிதி நிறுவனத்தைத் தொடங்கலாம் . மாறாக விமானப் போக்குவரத்தைத் தொடங்கக்கூடாது . இது தான் ஒத்திசைவான வாய்ப்புகள் . இந்த வாய்ப்புகளை முழுமையும் பணமாக்கம் செய்த ஒரு நிறுவனமாக HDFC ஐ சொல்லலாம் . முன்பே சொன்னபடி HDFC முதலில் வீட்டுக்கடன் வழங்கும் நிறுவனமாக மட்டும் தொடங்கப்பட்டது . பின்னர் HDFC வங்கி , வங்கி அல்லாத நிதி நிறுவனமான (NBFC) HDB Financial Services முதலான நிறுவனங்கள் தொடங்கப்பட்டன . கல்விக் கடன் வழங்குவதற்கு HDFC Credila நிறுவனம் , வாழ்க்கைக் காப்பீட்டிற்கு HDFC Life , பிற காப்பீடுகளுக்கு HDFC ERGO , பங்கு முதலீடுகளுக்கு HDFC Securities , பரஸ்பர நிதி முதலீடுகளுக்கு HDFC AMC என்று நிதி சார்ந்த பல்வேறுபட்ட நிறுவனங்களைத் தொடங்கி நடத்தி வருகிறது . அந்த வகையில் நிதி சார்ந்த அதன் திறமை வளையத்தை (circle of competence) விட்டு அது ஒருபோதும் வெளியே வரவில்லை . ஆனால் அந்தத் திறமை வளையத்தின் எல்லைகளை அது விரிவுபடுத்திக் கொண்டது .

எதுவொன்றின் முடிவும் பிறிதொன்றின் தொடக்கமே . இந்தியா போன்ற வளர்ந்து வரும் பொருளாதாரங்களைக் கொண்ட நாடுகளில் வங்கிகள் செல்ல வேண்டிய தூரம் இன்னும் நிறைய இருக்கிறது . அந்த வகையில் HDFC நிறுவனத்திற்கு இது ஒரு நல்ல ஆரம்பமாக இருக்கும் .

சரி , இப்போது HDFC வங்கிப் பங்குகளை வாங்கலாமா ? HDFC வங்கிப் பங்கின் IPO , 1995 ஆம் ஆண்டு அதன் முக மதிப்பில் வெளியிடப்பட்டது . நாளது தேதி வரை அது 30 சதவீத CAGR கொடுத்திருக்கிறது . தற்போது வாங்குபவர்களுக்கு இந்த அளவு வருமானம் கிடைக்க வாய்ப்பில்லை . ஆனால் நீண்ட கால அளவில் 20 சதவீத CAGR தருவதற்கான வாய்ப்புகள் பிரகாசமாக உள்ளது .