எளிமையே வெல்லும் - 2

எளிமையே வெல்லும் - 2

புதிய பரஸ்பர நிதி வெளியீடுகளில் (New Fund Offer) முதலீடு செய்வது சிறந்ததா அல்லது சந்தையில் ஏற்கெனவே செயல்பட்டுக் கொண்டிருக்கும் நிதிகளில் முதலீடு செய்வது சிறந்ததா ?

பரஸ்பர நிதி நிறுவனங்கள் அவர்கள் நிர்வகிக்கும் சொத்து மதிப்பை (Assets Under Management சுருக்கமாக AUM ) அதிகரிக்க அவ்வப்போது புதிய நிதிகளை வித்தியாசமான பெயர்களில் வெளியிடும் . TIGER என்ற பெயரில் ஒரு பரஸ்பர நிதி வெளிவந்தது . பங்குச்சந்தையில் காளை கரடி என்று கேள்விப்பட்டிருப்பீர்கள் . இந்தப் புலி எங்கிருந்து வந்தது ? TIGER என்றால் The Infrastructure Growth and Economic Reforms என்பதன் சுருக்கம் . விட்டேனா பார் என்று இன்னொரு பரஸ்பர நிதி நிறுவனம் LION என்ற பெயரில் ஒரு நிதியை வெளியிட்டது . Large cap Intermediate cap Opportunities New offerings என்பதன் சுருக்கம் LION . பரஸ்பர நிதி நிறுவனங்கள் இந்த மாதிரி வித்தியாசமான பெயர்களிலும் சேர்க்கைகளிலும் புதிய புதிய மிருகங்களைச் சந்தையில் உலாவ விட்டு மன்னிக்கவும் புதிய புதிய நிதிகளை வெளியிட்டு பத்து ரூபாய் யூனிட் பத்து ரூபாய்க்கே என்று கூவிக் கூவி விற்கும் . முதலீட்டாளர்களும் 5000 ரூபாய்க்கு 500 யூனிட் கிடைக்கும் என்று அகமகிழ்ந்து முதலீட்டை மேற்கொள்வார்கள் . புதிய நிதி வெளியீடுகள் ஏதோவொரு வகையில் தனித்துவமாக (unique) இருந்தாலன்றி அதில் முதலீடு செய்வது பெரும்பாலான சமயங்களில் நன்மை தருவதாக இருக்காது . இந்த மாதிரி தனித்துவமான பரஸ்பர நிதிகளாக MNC நிதிகளைச் சொல்லலாம் . ஒரு பரஸ்பர நிதி நிறுவனம் அவர்களிடம் இல்லாத ஒரு நிதியை (உதாரணமாக Midcap Fund என்பதான நடுத்தர நிறுவனப் பங்கு நிதி) வெளியிடுவதில் தவறில்லை . ஆனால் ஏற்கெனவே வேறு நடுத்தர நிறுவனப் பங்கு நிதிகளில் முதலீடு செய்திருக்கும் முதலீட்டாளர் இந்தப் பத்து ரூபாய் பகட்டில் விழுந்து முதலீடு செய்யும் போது தான் பிரச்னை எழுகிறது . பரஸ்பர நிதி நிறுவனங்களையும் ஒட்டுமொத்தமாகக் குறை சொல்ல முடியாது . ஒரு பரஸ்பர நிதி சிறப்பாகச் செயல்பட்டு அதன் நிகர சொத்து மதிப்பு ( Net Asset Value சுருக்கமாக NAV ) 1000 ரூபாய் என்ற அளவை எட்டி விட்டதாகக் கொள்ளலாம் . 5000 ரூபாய்க்கு வெறும் 5 யூனிட் மட்டுமே கிடைக்கும் என்று எந்த முதலீட்டாளரும் அதில் முதலீடு செய்ய மாட்டார்கள் . இந்த இடத்தில் ஒரு சிறிய கணக்கைப் போட்டுப் பார்க்கலாம் . 10 ரூபாய் யூனிட் பத்து சதவீதம் இலாபமீட்டினால் அதன் NAV 11 ரூபாய் ஆகும் . 1000 ரூபாய் யூனிட் பத்து சதவீதம் இலாபமீட்டினால் அதன் NAV 1100 ரூபாய் ஆகி விடும் . உங்களிடம் எத்தனை யூனிட் இருக்கிறது என்பது இங்கே பிரச்னையில்லை . நீங்கள் அதன் மொத்த மதிப்பை மட்டுமே கணக்கிட்டுப் பார்க்க வேண்டும் . ஆயிரம் ரூபாய் ஆன பரஸ்பர நிதி சிறப்பாகச் செயல்பட்டதால் அதன் NAV அந்த இலக்கை எட்டியிருக்கிறது . அந்த நிதி புதிய நிதியை விடச் சிறப்பாகச் செயல்பட வாய்ப்புகள் அதிகம் . ஆக , முதலீட்டாளர்கள் NAV அதிகமாகவுள்ள பழைய நிதிகளில் முதலீடு செய்ய முன் வராததால் பரஸ்பர நிதி நிறுவனங்கள் புதிய நிதி வெளியீடுகளை மேற்கொள்கின்றன என்றும் சொல்லலாம் . இன்னொரு முக்கியமான விஷயம் , SEBI விதிகளின் படி , பரஸ்பர நிதி நிறுவனங்கள் ஒரு பரஸ்பர நிதியில்  நிர்வகிக்கும் சொத்துக்களும் (AUM) அதன் மேலாண்மைச் செலவுகளும் எதிரெதிர் விகிதத்தில் இணைந்துள்ளது . ஒரு பரஸ்பர நிதியின் சொத்து மதிப்பு குறைவாக இருந்தால் அது அதிகமான மேலாண்மைச் செலவுகளை ஈட்டலாம் . ஆக , அரசாங்க சட்ட திட்டங்கள் , பரஸ்பர நிதி நிறுவனங்கள் புதிய நிதி வெளியீடுகளை வெளியிடுவதற்குச் சாதகமாக இருக்கின்றன . ஆனால் முதலீட்டாளர்கள் பல காளைச்சந்தைகளையும் கரடிச்சந்தைகளையும்  பார்த்த பழைய பரஸ்பர நிதிகளில் முதலீடு செய்வது தான் சாலச் சிறந்தது . அதே மாதிரி ஒரேயொரு பன்மய நிதியில் ( Diversified Fund ) முதலீடு செய்தால் மட்டும் போதுமானது . Parag Parikh Flexi Cap Fund ஐ குறிப்பிட்டுச் சொல்லலாம் . அது Value Research தர மதிப்பீட்டில் ஐந்து நட்சத்திரக் குறியீடு பெற்ற நிதி . நிதியின் 35 சதவீதம் Google , Amazon , Microsoft , Facebook உள்ளிட்ட வெளிநாட்டு நிறுவனப் பங்குகளில் முதலீடு செய்யும் வண்ணம் உலகளாவிய வகையில் அது வடிவமைக்கப்பட்டுள்ளது. 65 சதவீதம் உள்நாட்டு நிறுவனப் பங்குகளில் முதலீடு செய்யப்படுவதால் வரி வகையறாக்கள் நிதிக்கு சாதகமாக உள்ளது . அது ஒரு மதிப்பு முதலீட்டு நிதி . மேலாண்மைச் செலவுகள் வெறும் 0.78 சதவீதம் மட்டுமே . விற்று முதல் விகிதம் (Turn over ratio) வெறும் 14.57 சதவீதம் மட்டுமே . விற்று முதல் விகிதம் என்றால் நிதி , பங்குகளை வாங்கி விற்கும் வருடம் ஒன்றுக்கான விகிதம் . விற்று முதல் விகிதம் குறைவாக இருந்தால் நிதி , பங்குகளை வாங்கி நீண்ட காலத்திற்கு வைத்திருப்பதாக அர்த்தம் . நிதியின் மூன்று மற்றும் ஐந்து வருட வருமானம் 22 மற்றும் 16 சதவீத CAGR என்ற அளவீட்டில் உள்ளது . இவ்வாறு எந்த அளவீட்டில் பார்த்தாலும் நிதியின் செயல்பாடு சிறப்பாக உள்ளது . இந்த அளவீடுகளின் இடையிலான தொடர்பை முக்கியமாகக் கவனிக்க வேண்டுகிறேன் . நிதி , நீண்ட கால மதிப்பு முதலீட்டுக் கொள்கையைக் கடைப்பிடிப்பதால் அதன் விற்று முதல் விகிதம் குறை அளவுகளில் உள்ளது . இவ்வாறு குறை அளவிலான விற்று முதல் விகிதம் குறைவான மேலாண்மைச் செலவுகளுக்கு இட்டுச் செல்கிறது . குறை மேலாண்மைச் செலவுகள் NAV பெருக்கத்திற்கு உதவுகிறது . நிதி , நீண்ட கால முதலீட்டுப் பெருக்கத்திற்குச் சாதகமான Growth Option ஐ மட்டுமே கொண்டுள்ளது . மற்றபடி புதிய புதிய நிதி வெளியீடுகளில் தொடர்ந்து முதலீடு செய்து வந்தால் உங்கள் பரஸ்பர நிதித் தொகுப்பு ஒரு மிருகக்காட்சி சாலை மாதிரி ஆகிவிடும் . சிங்கம் புலி என்பதாகப் புதிய நிதி வெளியீடுகளை மேற்கொள்ளும் பரஸ்பர நிதி நிறுவனங்களின் கற்பனை வறட்சியைப் போக்கும் வகையில் நான் சில பரஸ்பர நிதி வகைகளை சிபாரிசு செய்கிறேன் . Bonus Opportunities Fund (உபரி நிதி சேரச் சேர இலவசப்பங்களிப்பை அளிப்பதான நிறுவனங்களில் மட்டும் முதலீட்டை மேற்கொள்ளும் நிதி) ROCE Fund (Return On Capital Employed குறைந்த பட்சமாக 20 சதவீதம் என்ற அளவில் இருப்பதான நிறுவனங்களில் மட்டும் முதலீட்டை மேற்கொள்ளும் நிதி) NPM Fund (Net Profit Margin அதிகமாக இருக்கும் நிறுவனங்களில் முதலீட்டை மேற்கொள்வதான நிதி) Multibaggers Fund (பன்மடங்காளராக ஆகக்கூடிய நிறுவனங்களை இனங்கண்டு முதலீடு செய்வதான நிதி) இது போகக் கடன் சுமையற்ற நிறுவனங்களில் முதலீட்டை மேற்கொள்வதான நிதி (Nil Debt Fund) , அகழி நிதி (Moat Fund) என்று அடுக்கிக் கொண்டே போகலாம் . தப்பித்தவறி பரஸ்பர நிதி நிறுவனங்கள் இத்தகைய நிதிகளை  வெளியிட்டால் நீங்கள் அத்தனை நிதிகளிலும் முதலீடு செய்ய வேண்டும் என்று எந்த அவசியமும் இல்லை . Parag Parikh Flexi Cap Fund மாதிரி ஒரு நிதி மட்டும் போதுமானது . உங்கள் பரஸ்பர நிதித் தொகுப்பை எளிமையாக வைத்துக்கொள்ளுங்கள் . எளிமையே இறுதியான அதி நுட்பம் .