ஆதிக்க சாய்வு

ஆதிக்க சாய்வு

Authority Bias

ஒரு துறை சார்ந்த வல்லுனர்களின் கருத்துக்கு மிகுந்த மதிப்பு கொடுத்து அதனைக் கண்ணை மூடிக்கொண்டு கடைப்பிடிப்பது , அவர்களின் எண்ணச்சிறையில் மாட்டிக் கொள்வது ஆதிக்க சாய்வு என்பதாக அழைக்கப்படுகிறது . அந்தத் துறை முதலீடாக இருந்து , வல்லுனர் பஃபெட் ஆக இருந்தாலும் அவருடைய கருத்தை ஆராய்ந்து அதனோடு நமது எண்ணங்களையும் சூழ்நிலைகளையும் கணக்கில் கொண்டே முதலீட்டு உத்திகளை மேற்கொள்ள வேண்டும் .

வாரன் பஃபெட்டின் குரு , பெஞ்சமின் கிரகாம் , net-net (Liquidation value) என்று சொல்லப்படும் முறையில் முதலீடு செய்வார் . நடப்பு ஆஸ்தியிலிருந்து நடப்பு பொறுப்புகள் மற்றும் நீண்ட காலக் கடன்களைக் கழித்து வரும் மதிப்பை மட்டும் கணக்கில் கொண்டு முதலீடு செய்யும் முறை இவ்வாறு அழைக்கப்படுகிறது . Intangible assets என்று சொல்லப்படும் நிறுவனங்களின் கட்புலனாகா மதிப்பு இந்தக் கணக்கில் வராது . கிரகாம் , அமெரிக்க பொருளாதார நெருக்கடியின் போது பங்குச்சந்தையில் ஏகப்பட்ட நஷ்டத்தை எதிர்கொண்டார் . அந்தக் காலகட்டம் அவருடைய முதலீட்டு உத்தியைத் தீர்மானிப்பதில் பெரும் பங்கை வகித்தது . உள்ளார்ந்த மதிப்பு (Intrinsic value) , திருவாளர் சந்தை (Mr Market) மற்றும் பாதுகாப்பு (Margin of safety) என்ற அவரது தாரக முதலீட்டு மந்திரங்கள் அப்போது தான் உருப்பெற்றன . அவர் காலத்தில் அந்த முதலீட்டு உத்தி ஏற்புடையதாக இருந்தது . இப்போது நாம் கிரகாமின் இந்த உத்தியைக் கடைப்பிடித்து முதலீடு செய்வதாக இருந்தால் ஒரு பங்கு கூடத் தேறாது . இந்த net-net உத்தியில் மேலும் ஒரு சிக்கல் இருக்கிறது . நிறுவனப் பங்கு இந்த net-net நிலையிலிருந்து வெளி வந்தால் அதாவது உயர் விலை வருவாய் விகிதங்களை அது எட்டினால் அத்தகைய பங்குகளை விற்க வேண்டிய ஒரு தேவையும் இருந்தது . வாரன் கொஞ்ச நாட்கள் அவரது குருவின் எண்ணச்சிறையில் மாட்டிக் கொண்டிருந்தார் . ஒரு கட்டத்தில் வாரனின் தொழில்முறைப் பங்குதாரர் சார்லி முஞ்சர் இந்தச் சிறையிலிருந்து அவரை விடுவிக்கிறார் . பின்னர் , வாரன் , Coca-Cola , See's Candy முதலான கட்புலனாகாத மதிப்பைக் கொண்ட நிறுவனங்களில் முதலீட்டை மேற்கொண்டதும் அப்புறம் நடந்ததும் வரலாறு . இத்தகைய நிறுவனப் பங்குகளை , நிறுவனங்கள் நன்கு செயல்படும் வரையில் கையில் வைத்திருக்கலாம் . அவற்றின் விலை வருவாய் விகிதத்தைப் பொறுத்து விற்கவோ அல்லது மறுபடி வாங்கவோ வேண்டியிருக்காது . பிற நிறுவனப் பங்குகளை ஆராய்ந்து முதலீட்டை மேற்கொள்ள உங்களுக்குப் போதுமான நேரம் கிடைக்கும் . 

கிரகாமின் முதலீட்டு உத்திகளைக் காலத்திற்குத் தகுந்த மாதிரி வாரன் கட்டமைத்துக் கொண்டாரே அன்றி அவற்றை முற்றாக அவர் விலக்கவில்லை . Intrinsic Value என்று சொல்லப்படும் உள்ளார்ந்த மதிப்புக் கணக்கீடுகளில் நிறுவனங்களின் கட்புலனாகா மதிப்பையும் அவர் கணக்கில் கொண்டார் . Margin of safety ல் கிரகாம் மாதிரி கணித சமன்பாட்டைப் பயன்படுத்தாமல் ஒரு நெகிழ்வுத் தன்மையை மேற்கொண்டார் . இல்லாவிட்டால் Coca-Cola போன்ற ஒப்பீட்டளவில் உயர் PE விகிதங்களில் வர்த்தகமாகும் நிறுவனப் பங்குகளில் அவர் முதலீடு செய்திருக்கவே முடியாது . ஆனால் Mr Market இடமிருந்து மதிப்பு முதலீடாகப் பங்குகளை வாங்க வேண்டும் என்பதில் அவர் சமரசம் செய்து கொள்ளவில்லை . 

பஃபெட்டிற்கு அவர் வைத்திருக்கும் காப்பீட்டு நிறுவனங்கள் மூலமாக float என்ற வகையில் ஏகப்பட்ட பணம் பூஜ்ய சதவீத வட்டியில் கிடைக்கப் பெறுகிறது . Float என்பது காப்பீடுதாரர்கள் கட்டும் முனைமத்தொகை . காப்பீடுகளை நிறுவனம் முறையாக வழங்கினால் , காப்பீடுகளுக்கான உரிமைத்தொகையைக் குறைவாகவே கொடுக்க வேண்டியதாக இருக்கும் . மேலும் இந்த முனைமத்தொகை நிரந்தரமாக நிறுவனத்தின் கையில் தங்கியிருக்கும் . இந்தப் பணத்தைக் கொண்டு , பஃபெட் , முழு நிறுவனத்தையும் மொத்தமாக வாங்கிப் போடுவார் . சிறு முதலீட்டாளர்களாகிய நம்மால் அது முடியாது .

பஃபெட் , மதிப்பு முதலீடாக நிறைய நிறுவனங்களை வாங்கியிருக்கிறார் . இவற்றில் Coca-Cola , See's Candies போன்ற பல நிறுவனங்கள் சிறப்பாகச் செயல்பட்ட வண்ணம் உள்ளன . இது போக சராசரியாகச் செயல்படும் நிறுவனங்கள் ஏராளம் அவர் வசம் உள்ளன . பஃபெட் இவற்றில் எதனையும் விற்க மாட்டார் . விற்றால் அவற்றுக்கு நீண்ட கால மூலதன ஆதாய வரி கட்ட வேண்டிய தேவை எழும் . இந்த வகையில் பங்குகளை விற்றால் அரசாங்கத்திற்குச் செலுத்த வேண்டிய பணம் அவற்றை விற்காததால் முதலீட்டுப் பெருக்கம் என்ற வகையில் பஃபெட் கையில் உள்ளது . பஃபெட்டின் இத்தகைய தாங்குதிறன் நம்மிடம் இருக்கும் என்று சொல்ல முடியாது . 

பங்குப் பன்மயமாக்கம் (diversification) குறித்து பஃபெட்டிற்கு நம்பிக்கை இல்லை என்பதும் ஒரு தோற்றப்பிழை மட்டுமே . அவருடைய பங்குத்தொகுப்பில் , தற்போது , பங்குச்சந்தையில் பட்டியலிடப்பட்ட 38 நிறுவனங்களும் , பங்குச்சந்தையில் பட்டியலிடப்படாத 68 துணை நிறுவனங்களும் உள்ளன . அந்த வகையில் பங்குப் பன்மயமாக்கத்தில் அவர் நம்பிக்கை கொண்டவராகவே இருக்கிறார் .

சுருக்கமாகச் சொல்ல வேண்டுமென்றால் பங்கு முதலீடுகளில் ஒரு கால கட்டத்திற்குப் பொருந்துவது மற்றொரு காலகட்டத்திற்குப் பொருந்தாது . ஒருவருக்குப் பொருந்துவது பிறிதொருவருக்குப் பொருந்தாது . ஒருவரின் முதலீட்டு உத்தியே காலம் செல்லச் செல்ல பரிணாம வளர்ச்சிக்கு உள்ளாகும் .

ஆக , உங்களுக்கே உங்களுக்காக முதலீட்டு உத்திகளைக் கருவாக்கி உருவாக்கி அதனைத் திருவாக்குங்கள் .

நுட்பமாக அறிய வேண்டியது :

1. முதலீடுகளில் , ஒரு காலகட்டத்திற்குப் பொருந்துவது இன்னொரு காலகட்டத்திற்குப் பொருந்தாது .

2. ஒருவருக்குப் பொருந்துவது இன்னொருவருக்குப் பொருந்தாது .

3. ஒருவருக்கே ஒரு சமயத்தில் பொருந்துவது பிறிதொரு சமயத்தில் பொருந்தாது .

4. எல்லாக் கால்களுக்கும் பொருந்துவதான காலணி என்று ஏதுமில்லை .